မေလေးရဲ့ နားနေရာ

မေလေးရဲ့ အလွဲများ ၃

2011-10-11T14:49:00.000+07:00

--- ကျောင်းက သင်ပြီးတဲ့ စာကို ဖေဖေက အိမ်မှာ ပြန်သင်ပေးပါတယ်။ အင်္ဂလိပ်လိုနားမလည်ရင် ဖေဖေ့ကိုချည်း မေးရတာလေ။ မေမေက မူလတန်းအောင်ထိပဲ နေခဲ့ရလို့ အင်္ဂလိပ်စာ မသင်ခဲ့ရဘူးတဲ့။ အမေရယ် အဖေရယ် ကိုယ်စာကျက်နေရင် ဘေးနားမှာထိုင်လို့။ အဲ့မှာ I - အိုင် / you - ယူ လို့ အသံထွက်ရာမှာ ဖေဖေက အသံထွက်အမှန် ပြန်သင်ပေးတယ်။ ဝိုင်အိုယူ-ယူ= သင်သည်။ ကိုယ်က ဝိုင်အိုယူ = သင်သည် လို့ဆိုတယ်။ ဝိုင်အိုယူ- ယူ လို့ ဆိုတော့ ကိုယ် ဖေဖေ့ကို ပြန်ပြောလိုက်တယ်။ ယူ လို့ တခါ ဆိုပြီးပြီးလို့။း) မေမေကလည်း ဘေးကနေ ထောက်ခံတယ်။ ကလေးက ဆိုပြီးတာ ဟုတ်တာပဲတဲ့။း)

--- မေမေတို့နဲ့ စိတ်ကောက်ပြီး အိမ်ကနေ ထွက်ပြေးပါတယ်။(စိတ်ထဲမှာ ကိုယ့်ကို လိုက်ရှာမလားလို့ပေါ့လေ။ ) ဆယ်နှစ်သမီးက ဝေးဝေးလည်း မသွားတတ်တော့ ရပ်ကွက်တခုကျော်က ဘုန်းကြီးကျောင်းတန်ဆောင်းမှာ သွားနေနေတာလေ။ ဗိုက်ဆာရင် ရေအိုးစင်က ရေသောက်လိုက်။ တန်ဆောင်းက ခုံတန်းလေးပေါ် ထိုင် အိပ်လိုက် လုပ်နေတာ.. ကိုရင်တပါးက မြင်ပြီး ဒကာမလေး ဘာလုပ်နေတာလဲတဲ့ ကိုယ်က လက်အုပ်ကလေးချီပြီး ပြန်ပြောလိုက်တယ်။ ကစားနေတာပါ ဘုရားလို့။ ဘာမှတော့ မပြောတော့ဘဲ ထွက်သွားရော။ ညနေ ငါးနာရီလောက် ဒေါ်ကြီးတို့အိမ်ကို လှည့်ပြန်တာပေါ့။ ဒေါ်ကြီးက သူ့ဆီမလာလို့ မေးတာကို ဖြေရင်း ထမင်းစားပြီး မေမေတို့ဆီ ပြန်လာပါတယ်။ မေမေတို့က သိတောင်မသိပါဘူးတဲ့။ ဒီတိုင်း သွားကစားနေတယ်ထင်တာတဲ့။ ဖြေလိုက်ပုံက ….း( (အဲလိုပီပြင်တာ ကိုယ်က။ စိတ်ကောက်တာ ဘူမှလည်း သိဝူး)း(

--- မေမေက ဒေါ်ကြီးတို့နဲ့ ခရီးထွက်သွားတုန်း ဖေဖေရယ် ကိုယ်တို့မောင်နှမတွေရယ်ချည်းကျန်တာမှာ တစ်ရက် ညပိုင်းမှာ ရပ်ကွက်ထိပ်အိမ်က မီးလောင်ပါတယ်။ ကိုယ်တို့ရပ်ကွက်ကလေးကလည်း အဲဒီထိပ်ဘက်ကပဲ အဝင်အထွက် လုပ်လို့ရတာကလား။ ထိပ်အိမ်မှာဖြစ်တယ်ဆိုတော့ တရပ်ကွက်လုံးပြေးလွှား ညံစီနေတာပေါ့။ ဖေဖေက အိမ်ပြင်ထွက်ကြည့်ပြီး ပြန်ဝင်လာပြီးတော့ သားသမီးတွေကို အိမ်ထဲခန်းမှာ စုထိုင်ခိုင်းတယ်။ ရွှေသွေးဂျာနယ်အထူးထုတ်(အထူကြီး)ကို ကိုယ့်ကိုဖတ်စေပြီး မောင်နှမတွေကို ဖတ်ပြခိုင်းတယ်။ ပြောပြခိုင်းတယ်။ ဖေဖေက မီးသွားကူငြှိမ်းမလို့တဲ့။ ဘယ်မှ မထွက်နဲ့နော်တဲ့။ မှာပြီး သွားတာ။။ နာရီဝက်ကျော်ကျော်မှာ ပြန်လာတယ်လေ။ ပြီးတော့ ရပ်ကွက်လူကြီးရောက်လာပြီး ဖေဖေ့ကိုပြောတယ်။ မင်းနှယ် ကလေးတွေကို အိမ်ထဲထားပြီး သွားတာလည်း သွားပေါ့။ တံခါးကို ပိတ်သွား။ ဂလန့်ထိုးသွားစရာလား။ ကလေးတွေကို ထွက်ချင်လို့မှဖြင့် ထွက်မရ၊ ပြုမရ ဖြစ်နေမှာပေါ့ ဆိုတော့ ဖေဖေက သူတို့ ပြေးလွှားပြီးရှုပ်နေမှာစိုးလို့ပါတဲ့။ ကဲ အဲလို ကိုယ့်ဖေဖေက ကိုယ့်လိုပဲ လွဲတာ။ မီးကလည်း အဲဒီအိမ် တစိတ်လောက်ပဲလောင်ပြီး ဘယ်မှ ထပ်မကူးဘဲ ငြိမ်းသွားလို့ တော်တာပေါ့။ ကိုယ်တို့ အိမ်တွေက (အရင်က အစိုးရတန်းလျား) တွေမို့ တအိမ်နဲ့ တအိမ်ဝါးထရံလေးသာ ခြားတဲ့ အခန်းဖွဲ့သဘောမျိုးလေ။ လောင်မယ်ဆို အတွဲလိုက်ပဲး)

--- သံလွင်ဥယျာဉ်ကို မိသားစုလိုက် သွားလည်ကြတာမှာ ဟိုရောက်တော့ မောင်နှမတွေ လျှောက်ပြေးဆော့ပေါ့။ မောလာရင် မေမေတို့နားလာ၊ အမောဖြေ၊ စားသောက် ပြီးမှ ပြန်ဆော့။ ဖေဖေက ဝင်္ကပါ ပတ်ခိုင်းပါတယ်။ သံလွင်ဥယျာဉ်မှာ ဝင်္ကပါ ဝင်ဆော့ဖို့ ဆိုတာ ရှိတယ်လေ။ ညီမလေးရယ် ကိုယ်ရယ် မောင်လေးရယ် ဖေဖေရယ်ပေါ့။ ဟဟားး။ မျောက်လွှဲကျော် ကိုယ်က လမ်းမတွေ့ရင် အပေါ်က ခုန်ကျော်ပြီး သွားတော့ အလယ်ပန်းတိုင်ကို အရင်ရောက်တယ်။ ပြန်ထွက်ရင်လည်း ထွက်ပေါက်ကို အရင်ရောက်တယ်။ ဖေဖေက ဒီကောင်မလေး တော်လိုက်တာဆိုပဲ ဟဲဟဲ။ ဒီနည်းကို သိရင် မခက်ဘူးမို့လား။း)

--- သချာင်္ကို အခက်ဆုံးအပုဒ်ကနေ စတွက်တတ်ပါတယ်။ အလွယ်ဆုံးဆီ ရောက်လာရင်တော့ ဦးနှောက်က ခုနအခက်တွေကို တွက်ပြီး အားကုန်သုံးပြီးထားလို့ ဘက်ထရီကုန်သွားသလိုမျိုး အဲဒီလွယ်လွယ်လေးဆိုတာတွေကို တွက်လို့ မတတ်တော့ပါဘူး။ အဲဒါ အမြဲတမ်းဖြစ်စဉ်ပါ။ ခုကျတော့ အဲဒီလွယ်လွယ်တွေလည်း မရ။ ခက်ခက်တွေကိုလည်း လက်ရှောင်နေ၇ပါတယ်။ ဒါက ဘာလွဲနေလို့လဲ မသိဘူး။ ဦးနှောက်စစ်ဆေးရေးဆီ သွားရတော့မယ်း)

--- ဟင်းချက်နေတဲ့ ဘွားဘွားဘေးနားထိုင်ပြီး ဟင်းချက်နည်း သင်ခိုင်းပါတယ်။ မေမေက မသင်ပေးပါဘူး။ ကိုယ်ကလည်း စိတ်က ဟိုရောက်ဒီပေါက်ဆိုတော့ အငြိမ်လုပ်ရမယ့် ဟင်းချက်တာမျိုးကို အပြီးမလုပ်မှာ မေမေ စိုးရိမ်ပုံရပါတယ်။ ဘွားဘွားပြောပုံက မြေးက ဘာဟင်းချက်တတ်ချင်တာလဲတဲ့။ ဟင်းချိုလို့။ ဘာလို့တုန်းဆိုတော့ သမီးက ဟင်းချိုပဲ စား၇တော့ ဟင်းချိုပဲ ချက်တတ်အောင် လုပ်ရမှာပေါ့လို့။ (ကျန်းမာရေးအရ ငရုတ်သီးမစားရသဖြင့် ဟင်းချိုနဲ့ အကြော်အလှော်တမျိုးမျိုးသာ စားရပါသည်) အဲဒါနဲ့ ဘွားဘွားက ကဲ ဒီလောက်ဖြစ်လှတာ သင်ပေးမယ်တဲ့။ တကယ်က ဟင်းချိုဆိုတာ ချက်ရ အလွယ်ဆုံးမဟုတ်လား။ သမီး မီးဖိုကို ခုနစ်ပတ် ပတ်ပြီးရင် ချက်တတ်ပြီတဲ့။ ကိုယ်လည်း ပတ်တာပေါ့ ။ (တကယ်ပါပဲ ဘွားဘွားရဲ့ မြေစိုက်မီးဖိုလေးကို ခုနစ်ပတ် ပတ်ပါတယ်) ပြီးတော့ ကိုယ့်ဘာကိုယ် ချက်တတ်ပြီ ထင်လိုက်ပါတယ်းPPPP ။ ဆား၊ အချိုမှုန့်၊ ကြက်သွန်နီဖြူ၊ ဘာမှထည့်စရာမလိုဘူးနော် ကိုယ်ဟင်းချက်တား) :P

--- အလယ်တန်းအရောက်မှာ ထမီ၊ ရင်ဖုံးဝတ်ရတော့ ထမီကို (အဘွားသင်ပေးထားလို့) ကောင်းကောင်းဝတ်တတ်ပါရဲ့နဲ့ မဝတ်ပါဘူး။ အဘွားရှေ့မှာ ထမီလိုဝတ်ပြီး ကျောင်းရောက်ရင် စာကူးနေလို့ ခုံမှာ ထိုင်နေချိန်ကျ ပုဆိုးလို ခါးပုံစ ထုတ်ပြီး ဝတ်ပြီးသား ဖြစ်နေပြီ။ ဆရာမ စာမေးလို့ လဲ့လဲ့ဝါ တခါ ခေါ်ထတိုင်း အဲဒီပုဆိုးကို ပြန်ပြင်ဝတ်ရပါတယ်။ တခါမှာတော့ သမီး နင်ဒီလိုဝတ်တာ ဘာလို့လဲ မခိုင်လို့လားလို့ မေးပါတယ်။ ချောလဲရောထိုင် စကားလိုပဲ ခေါင်းငြိမ့်လိုက်တယ်။ အဲဒါဆို သူများစရင် ဘယ်လိုလုပ်မလဲ မေးရော။ ဘာဖြစ်ရမလဲ ဆရာမရယ်။ သမီးအထဲမှာ ဒူးလောက်ဘောင်းဘီတို ဝတ်ထားတာပဲလို့ ရင်ကော့ပြီး ဖြေလိုက်တယ် :P

--- ရပ်ကွက်ထဲ ကိုယ်တို့ ကလေးတွေတသိုက် နေ့ခင်းကျ ပြေးလွှားခုန်ပေါက် ကစားကြပြီး ညဘက်ကျ အငြိမ်မနေပါဘူး။ ကတမ်းပွဲတမ်း ကစားပါတယ်။ (အငြိမ့်ကသလိုမျိုးပါ။ ကိုယ်က အဲလိုပဲ ကစားနည်းခေါ်တတ်ပါတယ်။) ငယ်ငယ်တည်းကနေ အသက် ၁၂- ၁၃ လောက်ထိ ကပြီဟေ့ဆို မင်းသမီးလုပ်ရမှ ကျေနပ်တတ်တဲ့ ကိုယ်က ခေတ်တွေ ဘယ်လောက်ပဲ ပြောင်းလာ ပြောင်းလာ “မှုန်ရွှေရည်” သီချင်း တပုဒ်ကိုပဲ ကောင်းကောင်းဆိုတတ် ကတတ်ပါတယ်။ တခြားသီချင်းဆိုခိုင်းကခိုင်းလည်း မရဘူးပဲ။ သံစုံတီးဝိုင်းနဲ့ပေါ့။ အိုးဟောင်း ခွက်ဟောင်းတွေ မနေရပါဘူး။ ည ကတော့မယ်ဆို အဲဒါတွေ အိမ်က ကိုယ်စီသယ်လာကြပြီး ဇာတ်စင်ရှေ့ စီဝိုင်းပြီး ချ၊ တုတ်ချောင်းတွေလည်း အဆင်သင့်တင်ထား၊ မင်းသမီးက အမေထမီကို ရှည်ရှည်လေး ထပ်ဖြစ်အောင် စောင်တထည် ပတ်ထည့်(ခြေထောက်ဖျားနားမှာ ရှည်သွားတယ်လေ) မျက်နှာသုတ်ပဝါအကြီးကို ပခုံးပေါ်တင်၊ မရှိတရှိဆံပင်ကို ဆံထုံးပုံစံ(ထိပ်မှာစုချည်ပြီး ပန်းပန်ထားတာ)လုပ်လို့ “မှုန်ရွှေရည်…ကြိုင်ကာသာ သင်းကြည်…” အရင်အသံထွက်ပြီး ထွက်လာပါပြီ။ (ဘာလွဲနေသလဲသိလား။ မင်းသမီး မျက်နှာချေ၊ ပေါင်ဒါ၊ မိတ်ကပ်၊ သနပ်ခါး မလိမ်းထားပါဘူး။ တီးလုံးမစခင် သီချင်းဆိုပါတယ်။ လူရွှင်တော်တွေ မရောက်သေးဘူးလေ။ အဲဒါမျိုး က ချင်တာ။ က ချင်တာ။ :PPP )

--- နင့်ဒီတစ်ပုဒ်ပဲတတ်လားဆိုရင် လေဘာတီမမြရင်သီချင်း (အငြိမ့်မင်းသမီးနဲ့ စာရေးဆရာ) သီချင်းကို ဟန်ပါပါ ဆိုပါတယ်။ တီးလုံးပြောင်းဖို့လည်း ပြောပါတယ်။ လူပြက်တွေ ပြက်လုံးထုတ်ချိန်မရှိ။ ကိုယ်ချည်း က ချင်နေတာလေ။ (ဘယ်သူငှါးမလဲ ဒီမင်းသမီးကို။။။နော် ဒီခေတ်အတိုင်းဆို မင်းသမီးကခန်းဆို ရစ်လိုက်ကြမှာပဲ။)း)း)း))))))

အလွဲများကို ဆက်တိုက်ရေးမလို့ အကြံ လွဲသွားတာမို့။ ဒီမျှနဲ့ပဲ။ နောက်ထပ် အလွဲများကတော့ ရီစရာမပါတော့ဘူးလေ။ ဘဝအလွဲများဆီ ခပ်ပါးပါး လျှောက်ရပြီမို့။ ဖတ်ရလေးသွားမှာစိုးလို့ >_< ဟဲဟဲ ကျန်းမာပျော်ရွှင်ပါစေ

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

ကြေကွဲတေး

2011-10-08T15:10:00.000+07:00

အသက်တွေ ကြီးလာမှ

အချိန်တွေက တန်ဖိုးပိုကြီးလာ

ကျကွဲသွားတဲ့ အိပ်မက်တွေအတွက်

ဘယ်သူမှ လျော်ကြေးပေးမှာ မဟုတ်ဘူး။

ပုံမှန်အသက်ရှုနေရုံနဲ့

ဘဝကို ထုဆစ်လို့ရမယ် ထင်သလား...

ရွှေဖြစ်ကြောင်း သက်သေပြဖို့

ဘယ်တော့မှ ကြိုးစားမှာ မဟုတ်ဘူး။

လွဲချော်မှုတွေနဲ့ နေသားကျဖို့

ပြောင်းလဲခြင်းကို လက်ခံရလိမ့်မယ်။

မျှော်လင့်လို့ မသင့်တဲ့အရာကို

မျှော်လင့်နေတာလောက်

နာကျင်စရာ ကောင်းတာ ရှိပါဦးမလား။

ဖြစ်ချင်တဲ့ ဆန္ဒတွေ များနေပေမယ့်

လမင်းက

ကမ္ဘာတခြမ်းမှာပဲ အမြဲသာနေတော့

ဘုရားရှိခိုးတိုင်း

ဆုမတောင်းဖြစ်တာ ကြာ.. ပြီ..။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

မေလေးရဲ့ အလွဲများ ၂

2011-10-06T19:18:00.000+07:00

--- မေမေနဲ့တူတူ ဈေးရောင်းရပါတယ်။ မနက်အစောကြီးထပြီး ဈေးကြီးကို သွားပြီးဝယ်၊ ကိုယ်တို့ ဈေးကလေးမှာ ခွဲစည်းပြုပြီး ပြန်ရောင်းတာပေါ့။ မေမေစည်းနှောင်ပေးလိုက်တဲ့ ကနစိုသီးတွေ၊ မရမ်းသီးတွေကို ခြင်းတောင်းထဲ ထည့် ရွက်ပြီး ဈေးရုံတလျှောက်နဲ့ ရပ်ကွက်လေးတလျှောက် လှည့်အော်ရောင်းတာ…. လှမ်းခေါ်ဝယ်သူတွေက ဟဲ့ နင့်အသီးတွဲတွေက နည်းနည်းလေးပဲ ပါတော့တယ်။ လျှော့ဦးဆိုတော့ ကိုယ်ပြန်ပြောလိုက်ပုံက သင်းတယ်။ မယူချင် မယူနဲ့။ မလျှော့ဘူးလို့း) (အသီးတွဲက နည်းနည်းလေးပဲကျန်မှာပေါ့။ နှစ်လှမ်းသုံးလှမ်းလောက် လှမ်းပြီး ယူကြဦးမလား တခွန်းအော်ပြီးရင် အော်တိုဖြစ်နေတဲ့ ကိုယ့်လက်က ကနစိုသီး တစ်လုံး ဖြုတ်ပြီးသားပဲ ဟဲဟဲ။)

--- ငါး၊ပုဇွန်အပြွန်းတွေ(သူများမယူတဲ့ ငါးအသေးအနှုတ်ငါးစုံတွေ) ပုတ်ပြတ်နှုန်းကို ခေါက်ပြန်ပေးပုံစံနဲ့ ယူရောင်းပါတယ်။ ငါးရောင်းတဲ့သူက သေသွားတဲ့ ငါးတွေ၊ပုဇွန်တွေကို ရွေးဖယ်ပုံနေရင်း သနားနေပြန်ရော။ မေမေကတော့ ပြောသား။ သနားနေရင် နင်တို့ ကျောင်းဘယ်လိုနေမလဲ၊ စားမလဲတဲ့။ မသေသေးတဲ့ ငါးတွေပုဇွန်တွေတော့ မသေသင့်ဘူးပေါ့လို့။။ မေမေက ခေါင်းခေါက်ပါတယ်။ ဘာရမလဲ။ ဈေးနောက်ဖေး ရေနှုတ်မြောင်းထဲကို မသေသေးဘဲ ပါလာတဲ့ ငါး၊ပုဇွန် ပိစိကွေးအရှင်တွေကို ပြန်လွှတ်လွှတ်လိုက်ပါတယ်။ ပြီး ကိုယ့်ထက် နွမ်းပါးပုံရတယ်လို့ ထင်ရတဲ့ မောင်လေးအရွယ် ကောင်လေးတစ်ယောက်ကိုလည်း နေ့တိုင်း ငါး၊ပုဇွန် လက်တဆုပ်စာ(မေမေမသိအောင်) ပေးပေးနေပြန်ပါတယ်။ (ဘယ်သူမှ ခုထိမသိကြဘူးး) ငါးရောင်းသူက မသနားတတ်ဘူးဆိုတာ ဘယ်မှာဟုတ်လို့လဲ နော်း)

--- မေမေက မောင်လေးကို ပေါင်မှာတင်ထိုင်ပြီး ကိုယ်နဲ့ညီမလေးကိုကျတော့ တစ်ခုံပေါ့။ ဖေဖေ့ဆိုက်ကားပေါ်မှာ ထိုင်ကြပြီး ဘွားလေးဆီ မိသားစုလိုက် သွားလည်ကြပါတယ်။ ညီအစ်မနှစ်ယောက်သား စကားတွတ်ထိုး။ ဟိုဘက်ငေး၊ ဒီဘက်ငေး မပြီးနိုင်ကြဘဲနဲ့ ကိုယ့်လက်မချောင်းက ယားလာပါတယ်။ ကုတ်လို့လည်း မရ။ ညီမလေးလုပ်ပေးတာလည်း မပြေ၊ အယားပြေစေမယ့် နည်းကို တွေ့ပြီ။ ဖေဖေ့ဆိုက်ကားကယ်ရီယာဘီး(ဖေဖေနင်းနေဆဲဘီး)ထဲကို လက်ချောင်းကို ထိုးထည့်လိုက်ပါတယ်။ ကဲ အဆင်ကိုပြေလို့း)။။ တဖြည်းဖြည်း နာလာမှ မျက်ရည်တွေ ပုလဲခ၊ အသံပြဲနဲ့ အော်၊ ဖေဖေက ဘာဖြစ်လဲဆိုတော့ လက် စက်ဘီးထဲမှာလို့ ဖြေတာ။ (ကိုယ့်အဖေမို့ပြောတာမဟုတ်ဘူး။ သူလည်း လွဲတာပဲ) နင်းနေတာ မရပ်လိုက်ဘဲနဲ့ လက်ကို ဆွဲထုတ်လိုက်လေတဲ့။ ထည့်တုန်းက ထည့်ပြီး ထုတ်ဖို့ကျ မရဲဘူး။ ဘာကိုမှန်းမသိကြောက်နေတာ ဟဟားး။ ဖေဖေ ဆိုက်ကားရပ်ပြီး လက်မကို ဆွဲထုတ်တော့ လက်မအဆစ်ရိုးကလေးကိုပါ မြင်နေရပြီ ပွန်းနေတာလေ။ ဘွားလေးဆီ မသွားတော့ဘဲ ဆေးခန်းပြေးရတာပေါ့။ ၇ ချက် ချုပ်ရတယ်။ လက်မအဆစ်ရိုးလေးက ခပ်လွဲလွဲလေး စောင်းနေတယ် ဟဲဟဲး)

--- ဒီထက်အရင် အလွဲက မောင်လေး မမွေးခင်ပေါ့။ မေမေရယ် ညီမလေးရယ် ကိုယ်ရယ် ရုပ်ရှင်သွားကြည့်ကြတယ် ညပွဲ။ ဖေဖေမပါဘူး။ ဖေဖေနဲ့ မေမေ စိတ်တွေ ကွေးကြလို့ ဆိုပဲ။ မောင်လေးကိုယ်ဝန်ကို လွယ်ထားရတဲ့ မေမေနဲ့ ညီအစ်မနှစ်ယောက်သား ရုပ်ရှင်ထိုင်ကြည့်နေတာ… ဘာတွေပြမှန်းမသိဘူး။ အိပ်ငိုက်လာတယ်။ မေမေ့ကိုပြောတယ် အိမ်ပြန်မယ် အိပ်ငိုက်နေပြီဆိုတော့၊ ရုပ်ရှင်ရုံထဲ ခုံတန်းတွေက လူနည်းလို့ရော အလယ်ပိုင်းခပ်ကျကျ ဆိုတာကြောင့်ရော လွတ်နေတော့ ခုံတန်းပေါ်မှာပဲ အိပ်လိုက်ဖို့ပြောပါတယ်။ ရွှေထီးလည်း မဆောင်းရပါဘဲ ဆန်မရှိ အစားကြီးတဲ့ မေလေးက အခြေကြီးပြီး မအိပ်တတ်ပါဘူး။ ဒီတိုင်း ထိုင်ငိုက်တာမှာ ငိုက်ရင်း ငိုက်ရင်း မျက်စိထဲ သံမံတလင်းအခင်းကို အိမ်က အိပ်ရာခင်းမှတ်သွားပါတယ်။ ခုံပေါ်ကနေ ဒိုင်ဗင်ခုန်ဆင်းလိုက်တာမှာ အိမ်ကြမ်းခင်းမဟုတ်တဲ့ သံမံတလင်းနဲ့ ကိုယ့်နဖူးက သွားမိတ်ဆက်၊ သွေးတွေ ထွက်လာပါရော။။။ ဟဟားး မေမေက ကမန်းကတန်း သူယူလာတဲ့ ပဝါနဲ့ သုတ်ပေးတာ မရပ်ဘူး။ ဒါနဲ့ သားအမိသုံးယောက် ရုပ်ရှင်ရုံထဲက ထွက်ကြရတာပေါ့။ မေမေက ဗိုက်နဲ့မို့ ကိုယ်ရယ်၊ ညီမလေးရယ်ကို လက်တဖက်စီ ဆွဲပြီး လမ်းလျှောက်ပြန်တာမှာ… နာပြီး သွေးထွက်နေတဲ့ ကိုယ်က မငိုရပါဘဲ ညီမလေးက အစားငိုပေးပါတယ်။ သူ့ကို မချီလို့တဲ့ ။ ကိုယ်က ကိုယ့်အနာကို ပဝါနဲ့ပိတ်ရင်း မေမေ့ကို ထမီစဆွဲပြီး လျှောက်၊ ညီမလေးကိုတော့ မေမေက ချီလိုက်ရတာပေါ့။ နော်။ သွေးထွက်နေတဲ့ အနာတောင် ဘယ်မှာ နာရမလဲ မသိအောင် လွဲတာ။။။ (ငိုမှ မငိုဖြစ်ဘဲ…..)

--- မေမေနဲ့ဖေဖေက စကားပြောရင် စကားပုံတွေ ပါတတ်တယ်။ ကိုယ်တွေကို ပြောမရရင်လေ။ နင်တို့ကို ပြောရတာ ကျွဲပါးစောင်းတီး နေသလိုပဲတဲ့။ ကျွဲအပါးမှာ ဘာလို့ စောင်းသွားတီးတာပါလိမ့်လို့ပဲ တွေးမိပါတယ်။ ဖေဖေပြောတာကို မနာဘူး လုံးဝ။ အလုပ်လုပ်ရင် ကောင်းကောင်းလုပ်ကြ။ ဘဲချေးပန်းသလို မလုပ်ကြနဲ့တဲ့။ ဖေဖေ ဘဲတွေ ချေးပါတာကိုတောင် သေချာကြည့်ထားတာပဲလို့ ထင်ပါတယ်။ မနာဘူး။ မေမေက ခိုင်းလိုက်လို့ ကြာနေရင် ပြန်လာတော့ ကြားရမှာက နတ်ကရာ ကျီးမော့ နေတယ်ဆိုတာပဲ။ အမှန်တကယ်လည်း ဟုတ်ပါတယ်။ ဟိုငေး ဒီငေး တွေ့ကရာ စာတွေ လိုက်ဖတ်နေတတ်တာမို့ တခုခုခိုင်းရင် အချိန်က ကြာတာပဲ။ ဒါပေမယ့် တလွဲတွေးတတ်တဲ့ မေလေးလေ။ မေမေ့ကို ပြန်ပြောလိုက်တယ်။ ကျီးက ဘယ်လို မော့မလဲ မေမေရယ်လို့။ သမီးကပဲ မော့ငေးနေတာလို့း)

--- ဆံပင်တိုတိုနဲ့ ရှပ်တွေ အဝတ်များတာမို့ မျက်နှာဆင်တဲ့ မောင်ဝမ်းကွဲနဲ့ အမွှာလား မေးခံရပါတယ်။ ခုန်ပျံကျော်လွှား သစ်ပင်တက်၊ စွန်လွှတ်၊ ဂျင်ပေါက်ကစားတာကိုလည်း ရတာမို့ ခု အဝေးကိုရောက်နေတဲ့ ဦးငယ်တစ်ယောက်က မေမေ့ကို မေးတာက ဘယ်လိုလဲဆိုတော့ အစ်မသားကြီးရော အိမ်ထောင်ကျပလားတဲ့ ကဲ (သူနဲ့က ငယ်ငယ်တည်းက ဝေးနေတာဆိုတော့လေ)

--- ကိုယ်ရှစ်နှစ်ကိုးနှစ်လောက်မှာ အဘိုးက ဒီဘက်ကို ခရီးထွက်လာမှာမို့ မြေးတွေ ဓါတ်ပုံရိုက်ခိုင်းပါတယ်။ ကိုယ်တို့ မောင်နှမသုံးယောက်ရယ် ညီမလေးဝမ်းကွဲ၊ မောင်ဝမ်းကွဲ သုံးယောက်ရယ် ဓါတ်ပုံတိုက်ကို သွားရိုက်ရရော။ ကိုယ်တွေကို တန်းစီရပ်ခိုင်းပြီး တည့်တည့်ကြည့်နေခိုင်းပါတယ်။ ကိုယ်က ခေါင်းတခြမ်းစောင်းနေလိုက်တယ်။ ဓါတ်ပုံဆရာက တည့်ခိုင်းတယ်။ ကိုယ်က မပြင်ဘူး။ ဒီတိုင်းနေနေတာပဲ။ ဘေးမှာညီမလေးက ပြီးဖြီးဖြီးတောင် ဖြစ်နေပြီ။ ကိုယ်က မျက်နှာရှုသိုးသိုးဖြစ်တုန်း၊ ဓါတ်ပုံဆရာကလည်း မပြောတော့ဘဲ ဒီတိုင်းရိုက်လိုက်ပါတယ်။ အမှန်က ကိုယ်က ကင်မရာကို ကြည့်နေတာ။ ဘယ်ထဲက ဘာထွက်လာတာလဲလို့လေ။ သူက ဝေးနေတော့ သေချာမမြင်ရဘူး။ ဒါကြောင့် ခေါင်းစောင်းပြီး အားထည့်ကြည့်နေတာ… ဟဲဟဲ ဒီအတိုင်းပဲ ကင်မရာမဲမဲကိုပဲ မြင်ရပါတယ်။း)

--- ဆံပင်ညှပ်ဆိုင်သွားရင် မေမေက အတိုပဲကြိုက်တာမို့ ဒိုင်ယာနာကေပဲ ညှပ်ပေးပါတယ်။ အဲတုန်းက ဒိုင်ယာနာဆိုတာ ဘာမှန်းမသိဘူး။ လုပ်ပေးတဲ့အတိုင်းနေလိုက်တာပဲ။ တခါ ဆံပင်ကို မညှပ်ဖြစ်ဘဲ ရှည်သွားရော။ မေမေ့ကို ဘိုးဘိုးကလည်း ဆူတယ်လေ။ သမီးမိန်းကလေးတွေကို ဆံပင်တိုပုံစံထားထားလို့ဆိုပြီး။ ဒါနဲ့ ဆံပင်ဆိုင် သွားပြီး အရှေ့လေးကို ပန်းကေ ဆိုလား ကောက်ပေးပါတယ်။ မှန်ထဲကြည့်ကြည့်ပြီး ငိုတာ။ ခေါင်းပေါ် အမှိုက်လာတင်ထားတယ် ဖြုတ်ပေးဆိုပြီးတော့်လေ။ ဒီတော့ကာ နားညီးလွယ်။ စိတ်မရှည်လွယ်တဲ့ မေမေက မခံနိုင်တဲ့အဆုံး ခေါ်ပြီး ဒီပြဿနာကို ရှင်းပေးလိုက်ပါတယ်။ ကျေးဇူးတင်သွားတာပဲ။ ပေါ့သွားလို့လေ။ ကတုံး တုံးပေးလိုက်တာပါး)

--- ဒုတိယတန်းအရောက်မှာ မေမေက ကျောင်းကို သွားအပ်ထားပြီး တန်းခွဲကို မမှတ်ခဲ့ဘူး။ ကျောင်းဖွင့်ရက်မှာ ကိုယ်နဲ့ညိမလေး ဒိတိုင်း ကျောင်းသွား၊ ညီမလေးကိုတော့ ကိုယ်က အခန်းထိ သွားထားပြိး ကိုယ့်အခန်းကိုတော့ မသိဘူးလေ။ ဟဟား လွယ်အိတ်တစ်လုံးနဲ့ တန်းခွဲ သုံးခုက အတန်းပိုင်ဆရာမတွေဆီ ပြေးပြေးမေးတာ။ ကျောင်းလာအပ်တုန်းက တန်းခွဲစာရင်း မချရသေးလို့ မရေးရသေးရင်းနဲ့ ကိုယ့်နာမည်က ဘယ်တန်းခွဲမှာမှ မပါတာတဲ့။ နောက်ဆုံး တန်းခွဲဘီက ဆရာမကပဲ သမီး ဒီမှာပဲ တက်တော့လို့ ပြောပြီး စာရင်းယူလိုက်ပါတယ်။ ကောင်းလေစွ။ အေ အခန်းစာရင်းမှာ ကိုယ်က ထိပ်ဆုံးဖြစ်ပါလျက် နာမည်မပါသွားတော့ဘူး။ ဘီမှာပဲ အခြေတည်လိုက်ရတယ်လေး)

အလွဲများ ၃ ဆက်ရန်….းP

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

မေလေးရဲ့ အလွဲများ ၁

2011-10-05T21:03:00.001+07:00

--- လောကကြီးထဲ စရောက်မယ်ဆိုတည်းက အလွဲနဲ့ပဲ စတင်ရတာပါပဲ။ မေမေက စနေနေ့တည်းက ဗိုက်နာပါတယ်။ သားဦးမို့ စနေမှာ မွေးမှာလည်း ကြောက်ကြတာပေါ့။ မွေးမလား၊ မွေးမလားနဲ့ သုံးရက်လွန်မြောက် ဗုဒ္ဒဟူးမနက်ရောက်ခါမှ နေတက်စ မှာ မွေးပါတယ်။ (အဲဒါကြောင့် ခေါင်းမာတယ်ဆိုပဲးP)

--- ဘယ်လမှာ မွေးတယ် ထင်ပါသလဲ။ မြန်မာစကားမှာ ရှိတယ်မို့လား ။ “ယောင်္ကျားဝါဆို၊ မိန်းမပြာသို” ဆိုတာ။ ကိုယ်က ဝါဆိုလဆန်းမှာ မွေးပါတယ်။ ကဲ။။။။း)

--- မေ့ကလေး မေ့ကလေးဆိုပြီး (နောင် မေလေးလို့ ဖြစ်လာမယ့်နာမည်) နာမည် မပေးဖြစ်တော့ မွေးစာရင်းလုပ်တော့ မေမေက မရွေးတတ်၊ မမှည့်တတ်၊ အဖေကလည်း အမေသဘောကျဆိုတော့ကာ မေမေ့နာမည် လဲ့လဲ့ဝင်း ဆိုတာမှာ ဝင်းကို ငသတ်၊ ဝစ္စပေါက်ဖြုတ် မောက်ချ ရေးထည့်ပြီး ဝါ လုပ်။ ကိုယ့်နာမည် လဲ့လဲ့ဝါ ဆိုတာ ဖြစ်လာပါတယ်။ (ဘယ်မှာမှ ရှာစရာ မလိုဘူး။ ကိုယ့်နာမည်အတွက်)း)

--- သားယောင်္ကျားလေးလိုချင်တဲ့ မေမေက ကိုယ့်ကို ယောင်္ကျားလေးလို ဆင်ပေးတော့ ဝတ်ရတာတွေက ရှပ်၊ ဘောင်းဘီတွေချည်းပဲ။ ဆံပင်တိုတိုနဲ့။ နားပေါက်ကို(အဘိုးတို့က ဖောက်ခိုင်းလွန်းလို့)ဖောက်ပေးထားပြီး ဘာမှ မပေးဝတ်ထားဘူး။ ကောင်းလေစွ။ ဒါတောင် ဖောက်လွဲလို့ ညာဖက်မှာ နှစ်ပေါက်ဆင့်ဖြစ်နေတယ်။း)

--- ကျောင်းနေအရွယ်ရောက်တော့ ဂါဝန်တွေ ဝယ်ပေးရတော့ ဘဝင်မကျတဲ့ မေမေက ရှပ်အင်္ကျီပုံစံ(ရဲမေယူနီဖောင်းပုံစံပခုံးခံနဲ့)ကို ချုပ်ပေးပြီး စကတ်တိုနဲ့ ပေးဝတ်ပါတယ်။ (ငယ်ငယ်က ကိုးရိုးကားရားကို နိုင်လို့)

--- ညီမလေးနဲ့ မောင်လေး ကို ထပ်ပိုင်ဆိုင်ပြီးတဲ့အချိန်မှာ ကိုယ်က ၆ နှစ်သမီးအရွယ်ရှိပြီမို့ ကလေးမွေးခြင်းဆိုတာကို နည်းနည်း နားလည်လာပါပြီ။ နားလည်တာက ဒီလို…။ ဗိုက်ပူပူထဲကနေ ကလေးလေး မွေးတယ် ဆိုတာပဲ။ ဒီတော့ ဖေဖေ့ကို ပြောတယ်။ မောင်လေးကို ဖေဖေ မွေးပြီး ညီမလေးကို မေမေမွေးတာမို့လား။ ဖေဖေပဲ နောက်မောင်လေးတစ်ယောက် မွေးပေးပါ။ မောင်လေးပဲ လိုချင်တယ် ဖေဖေလို့။ (ဟေ တခွန်းတည်း ပြောပြီး ဖေဖေ ပါးစပ် ဟနေပါရော) ဒါလေးပြောတာ ပါးစပ်ဟစရာလားလို့ အတင်းထပ်ပူဆာ …. ဟဟားးး။ ကိုယ်က နောက်ကနေ ပုဆိုးစဆွဲရင်းလိုက်နေတာကို ဖေဖေ ချွေးထွက်အောင် ပြေးရင်း မေမေကပဲ မွေးနိုင်တာကိုပြောပြပါတယ်။ ဒါဖြင့် ဖေဖေ့ ဗိုက်က ဘာလို့ပူနေတာလဲ မေးလိုက်တာပေါ့။ ဘာရမလဲ….း)

--- မေမေနဲ့အတူ မြို့သစ်က ဘွားလေးဆီ သွားလည်ပြီး ပြန်လာတော့ လိုင်းကားစီး ပြန်လာတော့ ကိုယ်က ဟိုဒီငေးပြီး စိတ်ဝင်စားနေတာပေါ့။ မော်လမြိုင်လိုင်းကားပေါ်မှာကလည်း ရွာတွေဘက်က တက်လာပြီမှဆိုရင်ဖြင့် ကား ဟိုဘက်ထိပ် ဒီဘက်ထိပ်ကို မွန်လို အော်ပြောတတ်ကြတာဆိုပဲ။ နားထဲ မွန်စကားကို နားရည်မရှိတော့ ဘာတွေလှိမ့်ပြောနေတာလဲ ဆိုပြီး ခေါင်းကို လည်နေတာပဲ။ ဟိုဘက်နားထောင်လိုက် ဒီဘက် နားစွင့်လိုက်နဲ့လေ။ အဲ့မှာ လိုင်းကားမှတ်တိုင်တွေနားရောက်ပြီဆိုရင် စပယ်ယာကို အော်ပြော၊ စပယ်ယာက ပြန်အော်ပြော ပြီးရင် မှတ်တိုင်ရောက်ရင် ကားရပ်၊ ဆင်းကြရတာကလား။

-ဘိုးဘွားပါတယ် ဆိုတဲ့ အော်သံအပြီးမှာ ကားရပ်တော့ အဖိုး အဖွားနှစ်ယောက် ဆင်းသွားတယ်။

-မောင်ငံပါတယ်ဆိုပြီး လူငယ်အစ်ကိုကြီးတစ်ယောက်ဆင်းသွားတယ်။ ခဏနေတော့ - မီးသတ်ပါတယ်တဲ့။ အော်သံအပြီးမှာ ကားရပ်၊ မီးသတ်ဝတ်စုံနဲ့ ဦးကြီးတစ်ယောက် ဆင်းသွားပါတယ်။ (အဲဒီအရွယ်မှာ သတင်းစာဖတ်၊ သူများအိမ်က တီဗီငေးပြီး သက်ဆိုင်ရာ ယူနီဖောင်းတွေကို နည်းနည်း သိနေပါပြီ။)

-ပြီးတော့ အလုပ်သမား ပါတယ်ဟေ့ဆိုပြီး ကားတုံ့ရပ်သွားတာနဲ့ အလုပ်သမားဝတ်စုံပြည့်နဲ့ ဦးကြီးတစ်ယောက် ဆင်းသွားပြန်ပါတယ်။ ကိုယ်တို့ ရပ်ကွက်လေးလည်း သိပ်မကျန်တော့ပါဘူး။ ကိုယ်က ငေးလှည့်ကြည့်ကောင်းတုန်းပေါ့။ အဲဒီမှာ ---- ဒေါ်ခင်ကြည်ပါတယ် ဆိုပြီး မိန်းမကြီးတစ်ယောက် အော်ပါတယ်။ ပြီး ကားရပ်တော့ အဲဒီမိန်းမကြီး(မေမေတို့လောက်ရှိ) ဆင်းသွားတယ်။

---- မေမေ့ကို လှည့်မေးလိုက်တယ်။ မေမေ သမီးတို့ နေတဲ့လမ်းထဲ ရောက်တော့မယ်မို့လားလို့ပေါ့။ မေမေက အင်းလို့ ဆိုတာနဲ့ ဒါဖြင့် မေလေးပါတယ်လို့ အော်လိုက်မယ်လေနော် လို့ မေမေ အလန့်တကြားဖြစ်သွားပါတယ်။ ပြီးတော့မှ ဈေးကလေး ပါတယ်ဆိုပြီး ကားရပ်တော့ ဆင်းပါတယ်။ ကိုယ့်ကို လက်ဆွဲရင်းပေါ့လေ။ ကိုယ်တို့က မင်္ဂလာဈေးရှေ့မှာ နေတာပါ။ ဘယ့်နှယ် ဈေးကလေးလဲ လို့ မေမေ့ကိုမေးတော့ “သမီးရယ်။ ဟိုးးးးတခါ သွားတာ ဈေးကြီး။ ဒါက ဈေးသေးသေးလေးမို့ ဈေးကလေး လို့ ခေါ်နေကြတာပေါ့” လို့ ပြောပြပါတယ်။ ( ဈေးတောင်မှ အကြီးအသေး၊ အမေနဲ့ ကလေးပေ့ါလို့ တွေးဖြစ်အောင် တွေးလိုက်ပါသေးတယ်း)

---ဘိုးဘွား = ဘိုးဘွားရိပ်သာ / မောင်ငံ = မောင်ငံရပ်ကွက် / မီးသတ် = မီးသတ်ဌာန / အလုပ်သမား = အလုပ်သမားရုံး / ဒေါ်ခင်ကြည် = ဒေါ်ခင်ကြည် အမျိုးသမီးသားဖွားမီးယပ်ဆေးရုံ တွေပါတဲ့။ မော်လမြိုင်မှာက ကားမှတ်တိုင်က နံပါတ်တွေရှိပေမယ့် မှတ်တိုင်ရှိနေရာက အဆောက်အဦး။ နေရာ စတာတွေကို စွဲပြီး ကားမှတ်တိုင်အမှတ်သညာ ပြုကြပါသတဲ့ ။ မေမေ ရှင်းပြမှ သိတာလေ :PPPP

နောက်များမှ အလွဲများ ၂ ကို ဆက်ရေးပါဦးမယ်ရှင့်။ ကျန်းမာပျော်ရွှင်ကြပါစေ။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

ဧရာဝတီ မြစ်ဆုံဆည် ဆက်မဖြစ်တည်ရ။

2011-09-24T11:31:00.003+07:00

ဧရာဝတီမြစ်ဆုံဆည်စီမံကိန်းတာဝန်ရှိလူကြီးမင်းများထံသို့။

ကျမက တိုင်းတပါးရောက်နေတဲ့ မြန်မာပြည်သူဖြစ်ပါတယ်။ ဘာမှ မတတ်တာမို့ တတ်တာ သိတာလေးနဲ့ပဲ ပန်ကြားပါတယ်။ မြန်မာပြည်သူ ဖြစ်တဲ့အားလျော်စွာနဲ့ မြစ်ဧရာအကြောင်းတစေ့တစောင်းမက ကြားနေခဲ့ သိနေခဲ့ရတာကိုပဲ ဆန္ဒပြုပါတယ်။ ဒီလိုပြောလို့ ငါတို့သာ သိတာမို့ပါ ဆိုရင်တော့ ကျမတို့ သုံးလူ့လောကမှာ မြတ်စွာဘုရားရှင်သာလျှင် အတုမရှိ အနှိုင်းမဲ့ အလုံးစုံ သိတော်မူသော အရှင် ဖြစ်တယ်ဆိုတာ အရင် ပြောပါရစေ။ ငါသာလျှင် အသိဆုံးဆိုရင်ဖြင့် ဘုရားရှင်နဲ့ ကိုယ့်ကို နှိုင်းယှဉ်နေမိတာမျိုး ဖြစ်သွားနိင်တာမို့ ဒီလို နှိုင်းယှဉ်မိရင်ဖြင့် အပယ်ရောက်မယ့်အရေးကို တင်ကြို သတိပေးပါရစေ။ ဘယ်သူမှ အသိဆုံး မရှိပါဘူး။ ကိုယ်တွေအသိဆုံးဆိုရင် ဒါ ကိုယ်ကျိုးတခုတည်း ဖြစ်မှာပါပဲ။

ဧရာဝတီအရေးဟာ နိုင်ငံရေး၊ စီးပွားရေး၊ လူမှုရေး အားလုံးပေါင်းစပ်ပါဝင်နေတဲ့အတွက် မြန်မာတမျိုးသားလုံးရဲ့ အရေး အမျိုးသားရေး ဖြစ်တာမို့ပါ။ လူကြီးမင်းများ ကိုယ့်လှေကိုယ်ထိုး ပဲခူးရောက်ရောက်၊ ကိုယ့်မြင်းကိုယ်စိုင်း စစ်ကိုင်းရောက်ရောက်လို့များ မိမိတဦးတည်းပိုင် ဆန္ဒ မဟုတ်ခဲ့ဘူး ဆိုရင်ဖြင့် ကျမရေးတဲ့ ဒီစာ လူကြီးမင်းတို့ အသိအမှတ်ပြုလိမ့်မယ်လို့ (မြန်မာတပြည်လုံးအပေါ် စေတနာရှိတယ်ဆိုရင်) မျှော်လင့်ပါတယ်။

၁. ကျမတို့ မြန်မာပြည်လူဦးရေ သန်း ၆၀ ရဲ့ ၇၀% ဟာ ဧရာဝတီမြစ်ကို အမှီပြုပြီး အသက်ဆက်နေခဲ့တာ။ မြန်မာပြည်သားရယ်လို့ ဖြစ်နေခဲ့တာ မဟုတ်ပါလားရှင်။

၂. ဧရာဝတီမြစ်ဝှမ်းဟာ မြန်မာပြည်ရဲ့ ၅၄% မျှ ကျယ်ဝန်းတာမို့ ဒီမြစ်ဟာဖြင့် မြန်မာပြည်ရဲ့ အသက်သွေးကြော မဟုတ်ပါလားရှင်။

၃. ဧရာဝတီမြစ်ကြောင့် သမိုင်းတွေ ရေးနိုင်ခဲ့ကြတယ်။ မြန်မာမင်းမှန်သမျှ ဧရာဝတီနဲ့ သမိုင်းထွင်းခဲ့ရပြီး ဧရာဝတီကိုတော့ စီးပွားသဘောက်တွေ ဆန္ဒအလျောက် မလုပ်ခဲ့ကြဘူး မဟုတ်လားရှင်။

၎. ခု ဧရာဝတီကို တားဆို့ ပိတ်ဆီး ဆည်ဆောက်ကြမယ်ပေါ့။ ပြဌာန်းထားတဲ့ ဥပဒေအရပဲလို့ဆိုဆို စီးပွားရေးအရပဲပြောပြော ဧရာဝတီကို ဘာကြောင့် ပိုင်းဖြတ်ချင်ရတာလဲ။ ဧရာဝတီဟာ ဈေးကွက်တင်ရောင်းရမယ့် အရာမှ မဟုတ်တာပဲ။

၅. ဧရာဝတီမြစ်ကို တားပြီး ဆည်ဆောက်တဲ့အတွက် ဆည်ဆောက်ရာဧရိယာဟာ အတော်အတန် ကျယ်ဝန်း(အမေရိကန်နိုင်ငံ နယူးယောက်မြို့ဧရိယာနီးပါး)တယ်လို့ သိရတော့ ဒီဧရိယာရရှိဖို့ မြေနေရာအတွက် ဖယ်ပေးလိုက်ရမယ့် ပြည်သူတွေအတွက် နေဖို့၊ ပြီးတော့ သူတို့ ပြောင်းရွှေ့လုပ်ကိုင်အတည်တကျဖြစ်ရဖို့ ဘယ်သူကများ အတိအလင်းတာဝန်ယူပေးမှာလဲရှင်။

၆. မြစ်အထက်ပိုင်းကို ပိုင်းဖြတ်ပိတ်ဆို့ ပြီးတဲ့အတွက် ကျန်မြစ်အောက်ပိုင်းမှာ ရှိမယ့် မြစ်ဝှမ်းဒေသတွေအတွက် မြစ်ကိုမှီခိုပြီး အသက်ဆက်နေရသူတွေ( စိုက်ပျိုးရေး။ ကုန်သွယ်ရေး၊ ရေလုပ်ငန်း၊ ပညာရေးအစရှိသဖြင့်x ) ကို ဘယ်လိုများ အသက်ဆက်စေမှာလဲရှင်။

၇. မြစ်အထက်မှာ ပိတ်တော့ မြစ်အောက်ပိုင်း ရေခမ်း၊ ကမ်းပါးပြို၊ ဒီရောက်တောတွေပျက်စီး၊ မြစ်ခမ်းတော့ ပင်လယ်ထဲ ရေမစီးဝင်နိုင်ရင် ပင်လယ်က ဆားငံရေတွေ မြစ်ကြောတလျှောက် ပြန်ဝင်ပြီး အဲ့ဒီဒေသတွေအတွက်ရော ဘာများ ပြင်ဆင်ထားပါပြီလဲ။

၈. ဒီနောက်မှာတော့ အကာအကွယ်မရှိဖြစ်တော့မယ့် မြစ်ဝှမ်းဒေသတလျှောက်က ရာသီဥတု ဆိုးရွားမှုတွေကို ဒေသနေပြည်သူတွေဆီကို တိုက်ရိုက်ရောက်လာတော့မှာမို့ သူဆင်းရဲ ပြည်သူတွေ ဒီထက် ပျက်စီးရပါဦးမယ်။

၉. လျှပ်စစ်ဓါတ်အား မလုံလောက်လို့များ ကျမတို့ မြန်မာပြည်သားတွေ ထိုင်ငိုနေခဲ့ဖူးသလား။ လျှပ်စစ်ဓါတ်အား အပြည့်အဝပေးရေး လို့များ ကြွေးကြော်တောင်းဆိုဖူးခဲ့ကြသလား။ ရေနံဆီမီးခွက်နဲ့ ဖယောင်းတိုင်နဲ့ကိုပဲ အေးချမ်းနေတတ်ခဲ့တယ်မဟုတ်လား။ ဧရာဝတီကို ပိုင်းဖြတ်သတ်ပြီးမှ ဒီလျှပ်စစ်မီး ရရမှာတဲ့လား။ အဲဒီလို လုပ်စရာ မလိုအပ်နေပါဘူးရှင်။

၁၀. တကယ်တမ်း လျှပ်စစ်ဓါတ်အား ကျမတို့ချည်းပဲ သုံးရမယ်တဲ့လား။ ကျမတို့မြန်မာပြည်သားတွေပဲ သုံးရဖို့ လျှပ်စစ်ဓါတ်အားရဖို့ ဒီမြစ်ကြီးကို ပိုင်းဖြတ်မှ ရရမှာတဲ့လား။ မလိုအပ်ပါဘူးလို့ ပြောပါရစေ။

၁၁. နိုင်ငံနဲ့အဝှမ်း ခု မြစ်ဆုံ၊ နောင် မြစ်ဝှမ်းအားလုံး (သံလွင်၊ ချင်းတွင်းမြစ်တို့အပါအဝင်) နီးပါး ဆည်ဆောက်မယ်ဆိုတဲ့ ”သောင်းကျန်းသူနှိမ်နင်းရေး မဟာဗျူဟာ” ကြောင့်များ ကျမတို့အသက်သွေး မြစ်ဧရာကို စပြိး စတေးခံရဖို့လား။

အမေးးတွေချည်းဖြစ်နေလို့များ လူကြီးမင်းတို့ အချိန်အလဟဿ မဖြစ်စေချင်ခဲ့ပါဘူး။ ဒီထက်ဒီထက်မက ကျမတို့ ပြည်သူတွေ ကလောင်ကိုင်တွေက လူကြီးမင်းတို့ကို ပြောခဲ့ကြပြီးပြီ။ အလေးမထားဘဲ ငါတကောကောတာမျိုး မလုပ်စေချင်ပါဘူး။ မြန်မာဟာ မြန်မာတွေ အားလုံးသွေးစည်းညီညွတ်ခဲ့ကြလို့ တစ်ဦးကောင်းတည်း မလုပ်ခဲ့ကြလို့ ခုထိ ရှင်သန်နေခဲ့ကြတာပါ။ ကျမတို့ကို (မြန်မာပြည်သားတွေကို)

၁။ ။ လူကြီးမင်းတို့ရဲ့ မြစ်ဆုံဆည်စီမံကိန်းရဲ့ အကျိုး၊ အပြစ်တွေကို အသိပေးပါ။

၂။ ။ ဧရာဝတီမြစ်ဟာလည်းပဲ ကျမတို့လို မြန်မာပြည်သား ဖြစ်တဲ့အတွက် အသက်သွေးကြောကြီး မပျက်စီးရအောင် ကာကွယ်ကြရမယ့် တာဝန်ရှိတဲ့ ကျမတို့မြန်မာပြည်သားတွေရဲ့ ဆန္ဒကို တိတိကျကျ အဖြူ၊ အမည်း ကွဲပြားသိအောင် အရင် မဲဆန္ဒ တောင်းပါ။

၃။ ။ မြစ်ဆုံဆည်ဆောက် ဒေသတလျှောက်နေ လူထုတွေအတွက် တင်ကြို ပြင်ဆင်ဖြည့်ဆည်းပေးမှုများကိုပါ တပါတည်း သိချင်ပါတယ်။

ဘာကြောင့်ဆို ကျမတို့က မြန်မာပြည်သားတွေ ဖြစ်နေတဲ့အတွက်ပါပဲ။ မြန်မာပြည်အရေးဟာ ကျမတို့အရေးပါပဲ။

၎။ ။ ခု တခါတည်း ရှင်းရှင်းပြောပါရစေ

မြစ်ဆုံဆည်ဆောက်စီမံကိန်းကို လုံးဝ(လုံးဝ) ဆန့်ကျင်ပါတယ်။ ပယ်ဖျက်ပေးပါ။

လူကြီးမင်းတို့အပါအဝင် ကျမတို့မြန်မာပြည်သားတွေရဲ့ အသက်သွေးဖြစ်တဲ့ ဧရာဝတီမြစ်ကို လူကြီးမင်းတို့လည်း ချစ်လိမ့်မယ်လို့ မျှော်လင့်ပါတယ်။ ခုလို ရေးတဲ့ စာ၊ ကန့်ကွက်စာတွေကို လူကြီးမင်းတို့ အသိအမှတ်မပြုရင်ဖြင့် လူကြီးမင်းတို့ဟာ မြန်မာပြည်ကို မချစ်သော၊ မြန်မာပြည်သူတွေကို မချစ်၍ အလေးမထားသော၊ မြန်မာပြည်ကို မချစ်သဖြင့် မြန်မာလူမျိုး မဟုတ်သော သူတွေ ဖြစ်ပါလိမ့်မယ်။ မြန်မာမဟုတ်ရင်ဖြင့်…….မြန်မာလူကြီးလုပ်လို့ မရပါဘူး။

ကျမ ထပ်ပြောပါရစေ……..

မြစ်ဆုံဆည်စီမံကိန်းကို လုံးဝ ဆန့်ကျင်ပါတယ် ပယ်ဖျက်ပေးပါ။

ဧရာဝတီ ဆက်လက်ရှင်သန်စေရမည်

ငါတို့ သွေးဖြင့် အဓိဌာန်ပြုသည်

မြစ်ဧရာပေါ် ဆည်မဆောက်ရ။

တားဆီးပိတ်ပင် ဆန့်ကျင်ပြုသည်

ငါတို့မြစ်ကြီး ဆက်စီးရမည်။

ဘယ်သဘောက်မျှ လက်မခံပါ။

တစက်ချင်းဆက်ပြီး ရေစက်များစွာ

အလျှံပယ်နဲ့ ငါတို့မြစ်ကို ပေါင်းစီစေ့မယ်။

ဘယ်ကွေ့ဝဲဝဲ အလံမလှဲဘူး

ငါတို့မြစ်နဲ့ တန်းတူ ရှိမယ်။

ဧရာဝတီကို ကျူးကျော်လာသမျှ

ငါတို့မြေက တိုက်ထုတ်ဖယ်ရှား

ဆည်စီမံကိန်း ဆက်မဖြစ်ရ။

ဆည် စီ မံ ကိန်း ဆက် မ ဖြစ် ရ။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

ရွာမယ်ဆိုရင်...

2011-09-15T16:38:00.001+07:00

ဘယ်ရာသီပဲပြောင်းပြောင်း

မဟောင်းတာက သစ္စာ..ဆို။

ဆုံတွေ့ ကြုံကွဲ

မလွဲတာက သစ္စာ…ဆို။

ပျော်လည်း မဟူ

ငိုလည်း မခွဲ

တွဲလက်မြဲမယ့် သစ္စာ…ဆို။

စိုသာ စိုပစေ့ ။

ငိုစေမယ် မဟုတ်ပါဘူးလို့

သစ္စာဆို အခိုင်ခိုင်ချည်(ပေမယ့်)

ဘယ်အရာကို မဏ္ဍိုင်တည်လို့

ဘယ်မှာများ မည်ခဲ့တာပါလိမ့်။

မပီတဲ့ သရုပ်နဲ့ ဟန်လုပ်

ပြန်မရုပ်ပေမယ့် အဆန်လှုပ်နေတဲ့ ခြေနဲ့

နွေဆို နွေ

မိုးဆို မိုး

ဆောင်းမှာတောင် မသိုးဘူးလို့ဆိုတဲ့

သူ့သစ္စာတရားအတွက်

ဒီတခါရွာပေးရရင် ငါက ဓားပါ ရွာတတ်တော့မယ်။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

စိုးစိတ်

2011-08-24T20:45:00.001+07:00

အဆင်း သာမည

မဝင်း မဝါလှပေမယ့်

အချင်း ပဓာနမို့

သင်းပျပျရနံ့သွေးကြွယ်လျက်

မြေသနင်းမှာ ကျရပေသည့်

အို.... ခရေငယ်။

ရေ ဘယ်ဆီ မှန်း... တမ်းစရာ မလိုပေဘု

အိုနေလုရင်သော်မျှ

တပွင့်ချင်းစီ တကိုင်းချင်းဆက်

ခက်လက်ဝေဆဲ

ကြွေဆဲ ခြေရင်း

ဒီလမ်းထက်ဆင်း... ခင်းမြဲပါလေ။

ယွင်းလဲ ရာသီ

အခါမမီရင်ဖြင့်

မသာမကြည် ထွေးသူ့ရင်မှာ

ကဗျာမပီမှာ စိုးမိတယ်။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

ဘလော့နှစ်နှစ်ပြည့်(သို့မဟုတ်) သူ ၃၄

2011-08-14T09:39:00.002+07:00

ဒီလမ်းထက် တူတူလျှောက်ရင်း

တစ်ရက်ထက် တစ်ရက်

ဆက်ဆက်နီးလာ

ဆုံရမှာ အမှန်မို့

ဘယ်လိုရင်ဆိုင် ပြုံးနိုင်ပါ့မလား

ရင်တွင်းထိုးထွင်း သိချင်စမ်းဘိ။

ပရကို တူးဖော်

အတ္တတွေ မြူးပျော်စံဖို့

ဘယ်နှရာသီများမှ ပြီးမှာတဲ့လဲ။

သိသာသိ ဖြတ်မထိတဲ့ ကိလေသာနဲ့

အရသာမသိတဲ့ ယောက်လို

သူရာနဲ့ နှစ်ပါးသွား

လစ်မနေအောင် သူ မေ့ရက်တယ်

ဝေးပေါ့တရား။

နှလုံးသားမှာ အဖေးတက်

အဆိပ်လည်း မပြယ်

လောကဓံကို အန်တုဖို့

ဘယ်နှခုနှစ်က သူ့ကို မွေးတာတဲ့လဲ။

မွေးခြင်းက တဖြည်းဖြည်းဝေးလို့

မရဏတရားက နဲ့နဲ့ နီးလာ

စိုင်းပြင်းနေဆဲ

မနောမှာ အာရုံငြိတယ်။

သူ မငြိမ်းချမ်းသေးပါလား။

အသိနဲ့ သတိ မတွဲလေသမျှ

လောကနဲ့ လောကီ နှစ်ဌာနီ

အောင်မြင်ရအောင် မစွမ်းဆောင်ပါ့လား။

ကိလေသာတဏှာမြစ်ထဲ

အစုန်အဆန် ဝဲရောက်

အဟုန်အမြန်နဲ့ သူ ဖြတ်တောက်

ရောက်ဆဲ လမ်းထက် လျှောက်တတ်ပါစေ။

ပေါက်ဆဲအတွေးထဲ အလင်းရောက်ပါစေ။

မွေးရက်တွေ တဖြည်းဖြည်းကျော်

သူ ဆန္ဒရှိရာ လှမ်းမျှော်နိုင်ပါစေ။

ချစ်သောသူများ မကွေကွင်းဘဲ

မနှစ်သက်သူ ကွင်းရှောင်မူလို့

အောင်မြင်တဲ့လမ်း အလှပန်းကို

ဆွတ်ချူနိုင်ပါစေ။

ဒီဘလော့လေးထဲ ကိုယ့်ခံစားချက်တွေ ကိုယ်ရေးချင်တာတွေ ထည့်ထည့်သိမ်းဖြစ်တာ မနေ့က၂၀၁၁ သြဂုတ်လ (၁၃)ရက်နေ့မှာ နှစ်နှစ်ပြည့်ပါပြီ။ သူ့ရဲ့ ၃၄ နှစ်ပြည့်မွေးနေ့လည်း ဖြစ်တာမို့ သူ့ကို ရည်ရွယ်ပြောကြား၊ အမှတ်တရကဗျာကို တင်ဖြစ်ပါတယ်။ ဘလော့စာမျက်နှာထက် သိပ်မရောက်ဖြစ်ပေမယ့် ဒီအိမ်လေးက မေလေးရဲ့ အပန်းဖြေရာလေးမို့ လာလည်သူ သူငယ်ချင်းတို့ကို ဒီကနေပဲ ကျေးဇူးတင်ကြောင်းပြောပါရစေရှင့်။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

မေ့ချင်တယ်

2011-07-14T15:17:00.000+07:00

အပြစ်ရယ်လို့

မြှုတမှုံမျှ မဆိုပေမယ့်

ငိုချင်အောင်တော့ လက်ပြခဲ့တာပဲလေ။

ခပ်ဖွဖွ ချခဲ့ရတဲ့ ပင့်သက်တွေကြား

မင်း ပြန်လာမလား

တစ တစ မျှော်လင့်မိချင်ရဲ့။

ခေါ်ခွင့်ရှိရင်တော့

ခဏလေးဖြစ်ဖြစ် ငဲ့ကြည့်ပေးခဲ့ပါ။

ခွဲရမယ်ဆိုတိုင်း

အသင့်မဖြစ်နေတဲ့ ငါ…။

သမုဒယနွံထဲ

ကျွံ မနစ်ချင်ပါဘူးကွယ်။

ဥပေက္ခာတရားကို အဖော်ပြု

နှလုံးသားကို အဖေးတက်အောင်

ခပ်ပါးပါးလေး ထုဆစ်ပြီးတဲ့အခါ

ခုလိုလေး နင် ချစ်ခဲ့တာကို ငါ မေ့ထားချင်လို့ပါ။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

အိမ်ပြန်ချင်တယ်

2011-05-06T11:34:00.001+07:00

သမီးလက်ကိုဆွဲ

အဖြူအစိမ်းလေးနဲ့ တွဲလို့

အမေ ကျောင်းကို ပို့တော့

ငိုတယ်…. အမေ အိမ်ပြန်ချင်တယ်။

ကျောင်းဝတ်စုံ အသစ်လေးနဲ့ပေမယ့် အမေ့သမီး မပျော်ခဲ့ဘူးနော်။ အမေ့ထမီစကို ဆွဲရင်း မျက်ရည်တွေ နှပ်တွေနဲ့ ဂျီကျနေတဲ့ သမီးကို အမေက တတွတ်တွတ် ချော့နေခဲ့တယ်။ အမေ့သမီးလေး ပျော်သွားမှာပါတဲ့။ သူငယ်ချင်းအသစ်တွေလည်း အများကြီးပဲရမှာတဲ့။ ဟုတ်လို့လား အမေ။ သူငယ်ချင်းအသစ်တွေလည်းရမှာပဲ။ ဆရာမလေးနဲ့ စာတွေ သင်ရမှာပါပဲ။ ပြီးတော့ မုန့်တွေလည်း စားချင်စားရမှာပဲ။ ဒါပေမယ့် အမေ့နားမှာတော့ မနေရတော့ဘူး မဟုတ်လား။ သမီး အိမ်ပဲပြန်ချင်တယ်အမေ။ အမေ့လိုမျိုး သူတို့က သမီးကို ချော့မှာမို့လို့လား၊ သမီးအိပ်ချင်လာရင် ပုံပြောပြမှာမို့လို့လား။ သမီးပူဆာတဲ့အခါ အမေဆိုပြသလို သူတို့က သမီးကို သီချင်းဆိုပြမှာမို့လို့လား။ သူတို့နဲ့တော့ ဆော့တော့ ဆော့ရမှာပေါ့မေမေ။ အမေလုပ်ပေးသလို စက္ကူရုပ်လေးတွေ လုပ်ပေးပါ့မလား။ ဆရာမက သီချင်းဆိုပြချင် ဆိုပြမှာပေါ့။ အမေ့လိုတော့ သမီးကို ပေါင်ပေါ်မှာ မတင်ထားဘူးမို့လား။ အမေ့ … အိမ်ပြန်ချင်တယ်။

ဝမ်းစာရှာ အစုစု

အမေနဲ့ အတူ ပြုရင်း

နေပူရိပ် စပ်ခါး

မနားရသမျှ

ခဏခဏ ပူဆာ

အမေ … အိမ်ပြန်ချင်တယ်။

အမေ့ရင်ဘတ်နဲ့ထပ်တူကျနေတဲ့သမီးက အကြီးပီပီ အမေနဲ့တူတူ မိသားစုအတွက် အလုပ်လေးတွေ လုပ်ရတဲ့အခါ အလုပ်ခွင်က သမီးလို ကလေးလေးအတွက် ဘယ်လို အေးချမ်းနိုင်ပါ့မလဲ။ အမေ့ကိုတော့ သမီး မစဉ်းစားတတ်ပေမယ့် သမီးကတော့ သိပ်မလုပ်ချင်ဘူး အမေ။ သမီးမဆော့ရတော့ဘူး။ နေလည်း ပူနေသေးတယ်။ ကျောင်းသွားချိန်ကိုလည်း အချိန်လုရသေးတယ်။ ဈေးတောင်းရွက်ရလို့ ခေါင်းကလည်း ပူပူထူထူကြီးဖြစ်နေပြီ။ ညနေတိုင်း ရေရောင်းရဖို့ ရေခပ်ရလွန်းလို့ လက်ဖဝါးမှာလည်း ကျွဲပခုံးဆိုလား ဘုထ နေတာပဲ။ ညပိုင်းတွေကျ လက်ဖက်ရည်ဆိုင်မှာ ပန်းကန်အငှားဆေးကူ လုပ်ရဦးမယ်။ ဆေးတာ မစင်ရင် ပြောခံရသေးတယ်။ မနက်လည်း အစောကြီးထပြီး အမေနဲ့တူတူ ဈေးရောင်းဖို့ လုပ်ရတော့ အိပ်ရေးလည်းမဝဘူးအမေ။ ဘာလို့ သမီးတို့လုပ်နေရတာလဲ။ အမေလုပ်နေလို့သာ လုပ်နေရပေမယ့် သမီးတော့ သိပ်မသိဘူးအမေ။ အမေတခုလုပ်တိုင်း ငါဝင်လုပ်ရင် အမေ သိပ်မလုပ်ရဘူးဆိုပြီးပဲ အမေလုပ်သမျှတွေ သမီးဝိုင်းလုပ်ပေးနေတာပါ။ ဒီလိုချည်းတော့ နေပူထဲ ဘယ်နေချင်ပါ့မလဲ အမေရယ်။ အမေနဲ့ တူတူနေရတဲ့ သမီးတို့အိမ်လေးမှာပဲ နေကြရင်ရော မရဘူးလား အမေ။ သမီး အလုပ်တွေနားပြီး အိမ်ပြန်ချင်တယ် အမေ။

ပြန်ချင်လျက် အပြန်ခက်ခဲ့တဲ့
ဒီအချိန် စိတ်ကူးလေး
ရိပ်ရိပ် လူး ထူးတဲ့ ဒီပင်လယ်ထဲ
တက်ကုန်နဲ့ ရွက်စုံဖွင့်
မာနခါးခါးတွေကို
မျက်ရည်နဲ့ ရောချ
ဩချ ရလောက်အောင်လည်း
အမေ့သမီး မောဟ များခဲ့ပါတယ်။

အမေ့နားမှာ ဒီလို နေချင်နေခဲ့တဲ့သမီး အမေ့နားကနေ အဝေးကို လာနေရတယ်နော်။ ပြန်ချင်တယ် ပြန်မယ် စိတ်ကူးရင်းနဲ့ အမေ့ထံပါး အမှာစကားသာ ပါးရင်း သမီး ဒီပင်လယ်ထဲ ကူးခတ်နေခဲ့တာကြာပေါ့။ ဘဝဆိုတာကို တိုက်ပွဲတခုလို တက်အကုန်နဲ့ ရွက်တွေလည်း စုံနေအောင် ဖွင့်ရင်း သမီး တိုက်နေခဲ့တာ။ ငယ်ငယ်ကလိုတော့ ကိုယ့်ရဲ့ အချိန်တွေ အလုခံရတာကို ဝမ်းမနည်းနေဘူးပေါ့။ သမီးရဲ့ မာနခါးခါးတွေက သမီးရဲ့ ဝမ်းနည်းမှုကို အန်တုထားခဲ့တာပဲ။ တရိပ်ရိပ် တိုက်ခတ်နေတဲ့ ဘဝမုန်တိုင်းတွေကို သမီး ကြုံခဲ့ရတာ နည်းတာမှ မဟုတ်ဘဲ အမေရယ်။ အမေရှိတဲ့အိမ်လေးကို ငယ်ငယ်ကလိုမျိုး ပြည့်စုံတယ် မထင်ခဲ့တာ သမီးမှားသလား အမေ။ မိုးရွာရင် သံစုံတီးဝိုင်းလို ကြားနေခဲ့ရတဲ့ မိုးယိုပေါက်တွေကို သမီးမုန်းတယ်။ ဝါးထရံတွေ တစချင်း ပဲ့ပဲ့နေလို့ အပေါက်တွေ ဖြစ်နေတာကို မုန်းတယ်။ နင်းလိုက်တိုင်း တကျွီကျွီမြည်တဲ့ ကြမ်းခင်းထိုးထိုးထောင်ထောင်ကို သမီးမုန်းတယ်။ အလုပ်လုပ်နေရင်း ထမင်းနပ်မှန်အောင် စားဖို့ မရှိနေတာကို မုန်းတယ်။ ကျောင်းသွားရင် ကျောင်းစရိတ်မလုံလောက်တာကို မုန်းတယ်။ လမ်းလျှောက်ရင်း ပြတ်ပြတ်သွားတတ်တဲ့ အမေပြန်ပြန်ချိတ်တွယ်ပေးထားတတ်တဲ့ ပလတ်စတစ်ကော်နဲ့ လုပ်ထားတဲ့ ကော်ဖိနပ်တဂွက်ဂွက်ကို မုန်းတယ်။ ဖိနပ်အသစ်ဆိုတာမျိုးက သမီးမှ သိပ်မဝတ်ခဲ့ရဘဲ အမေ။ အဆုံးစွန် သမီး ကျောင်းမနေရတော့တာကို မုန်းတယ်။ အဲဒီအမုန်းတွေက သမီးကို မောဟတွေ ဖြစ်စေခဲ့တယ်ထင်ပါရဲ့။ မလုံခြုံဘူးလို့ ခံစားရတဲ့အိမ်ကလေးကို အမေ့အတွက် ပြန်ပြင်ပေးဖို့၊ ထမင်းစားချိန်အပြင် ကျန်အချိန်တွေမှာပါ အမေစားချင်တာကို စားနိုင်ဖို့၊ ညီမလေး မောင်လေးတွေ ကျောင်းစရိတ် လောက်ဖို့၊ သမီးစီးခဲ့ရတဲ့ ဖိနပ်မျိုး သူတို့ စီးရမှာစိုးလို့ ပြီးတော့လေ အမေနဲ့တူတူ ညီမလေး မောင်လေးတို့ ပြည့်စုံ ပျော်ရွှင်ဖို့ ဆိုတဲ့ လောဘတရားတွေနဲ့ သြချရလောက်အောင် သမီး မောဟ များနေခဲ့တာပါမေမေ။

ခေါင်းမငုံ့စတမ်း အန်တု
ရန်ပြုစရာတွေကိုလည်း
မာန် မနုနေဘဲ ပြန်ရှုနေခဲ့ဖူးတယ်။

အမေ့သမီးက ငယ်ငယ်ကလိုတော့ သိပ်မငိုတတ်ခဲ့တော့ဘူးပေါ့အမေ။ ရေခြားမြေခြားမှာ ဘဝတွေ အဖုံဖုံကို ဆုံတွေ့ဖူးပြီးမှတော့ အမေ့သမီး မနုနွဲ့နေတော့တာ မထူးဆန်းလောက်တော့ပါဘူး။ ဖြတ်စားလတ်လျားတွေ ပေါတဲ့ နေရာမှာ နေနေရလို့လည်း ကိုယ်တိုင် ဖြတ်စားမခံရအောင် ကာကွယ်၊ ဘဝတူတွေအတွက် အန်တုရင်း အမေ့သမီးလေ အရင်က အမေ့နားမှာ တွယ်ကပ်ရင်း လူကြီးတွေ ဟောက်ရုံနဲ့တောင် မျက်ရည်ဝဲတတ်ခဲ့တာကို အိပ်မက်တောင် ဖြစ်နေပါပြီအမေ။ ကိုယ်တိုင် ကြုံခဲ့ရဖူးတဲ့ ဘဝခါးသီးမှုတွေက သမီးကို သင်ပေးလိုက်တာပဲလား။ သေချာတာတော့ အမေ သင်ပေးခဲ့တာပါပဲ။ ဘဝမှာ ရိုးသားတာက တန်ဖိုးအရှိဆုံးဆိုတာ၊ ရှိသင့်တဲ့ မာန ရှိနေဖို့ဆိုတာ၊ သူတပါးအပေါ် အနိုင်ယူလိုစိတ်မထားဘဲ ကိုယ်တိုင်လည်း လွယ်လွယ်နဲ့ အရှုံးမပေးရဘူးဆိုတာ၊ ညီမျှတဲ့ စိတ်ထားကို၊ ပြီးတော့ ရိုးရာယဉ်ကျေးမှုကို၊ ဘာသာတရားကိုင်းရှိုင်းမှုကို မပျောက်ပျက်အောင် ထိန်းသိမ်းရမယ်ဆိုတာတွေ အမေပဲ သင်ပေးခဲ့တာတွေလေ။ အမေက တခြားအမေတွေလို ပါးစပ်က မပြောတတ်ဘူး။ အမေ့အလုပ်တွေ။ အပြုအမူတွေ၊ အပြောအဆိုတွေကနေပဲ အမေ့ကိုယ်ခွဲတခုဖြစ်တဲ့ သမီးက သိခဲ့ တတ်ခဲ့ရတာပါ အမေ။

ပြန်ချင်လျက် အပြန်ခက်နေတဲ့
အမေ့သမီးလေ.....
ဒီအချိန် အိမ်ကပြင်လေး
နေဝင်ရင် သာယာသံတေး
ကြားမယ်မထင်ဘဲ
နားလည်း မဆင်နိုင်တဲ့ ဒီအဝေးကနေ
အမေ..... အိမ်ပြန်ချင်တယ်။

မျက်ရည်တွေ အိပ်မက်တွေကို ဥပေက္ခာပြုရင်း စမ်းတဝါးဝါးပေမယ့် အားတင်းလမ်းလျှောက်နေဆဲ ဖြစ်တဲ့ အမေ့သမီးလေ ပြန်ချင်လျက်နဲ့ အပြန်ခက်နေတုန်းပါပဲ။ အမေနဲ့တူတူ လျှောက်ခဲ့ရတဲ့ အိမ်ရှေ့က လမ်းကို လွမ်းတယ်။ ညအိပ်ရင် အမေ့ပေါင်ပေါ်မှေးလို့ အမေဆိုပြတဲ့ သီချင်းသံကို လွမ်းတယ်။ ညအိပ်တဲ့အခါ ခြင်ထောင်မရှိဘဲ ဒီတိုင်း စီတန်းအိပ်နေတဲ့ မောင်နှမတွေရဲ့ ခေါင်းရင်းကနေ အမေ ယပ်ခတ်ပေးတတ်တာကို လွမ်းတယ်။ မနက်မိုးလင်းတိုင်းမှာ အမေလုပ်ပေးတတ်တဲ့ ဆီမဆမ်းတဲ့ ပဲပြုတ်ထမင်းကြမ်းကို လွမ်းတယ်။ ကျောင်းသွားခါနီးတိုင်း ဖိနပ်ကို ပြန်ပြန်စစ်ပေးပြီး ပြတ်ခါနီးပြီဆို ပြန်ပြန်ချုပ်ပေးတတ်တဲ့အမေ့လက်ရာ ဖိနပ်လေးကို လွမ်းတယ်။ အမေနဲ့ တူတူ ရှိခဲ့တဲ့ သံစုံမြည်အိမ်ခေါင်မိုးလေးကို လွမ်းတယ်။မနက် ဘုရားရှိခိုးတိုင်းမှာ အမေ့ကိုပါ ရည်မှန်းကန်တော့ပြီး ဒီအချိန်ဆို အမေ ဘာလုပ်နေပြီလဲ ထပြီလား နေကောင်းရဲ့လား အဆင်ပြေမှာပါလို့ တွေးနေရင်းနဲ့လေ.. ပြီးတော့လေ အမေ… အမေ့ကို အမေ့ကို အမေ့ကို လွမ်းတယ်။ သမီး အိမ်ပြန်ချင်တယ် အမေ။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

လူမမယ် ဘဝနှင့်စိတ်ကူး

2011-04-26T16:55:00.002+07:00

လက်တဖက် ထီးကို ကျစ်နေအောင် ကိုင်ရင်း နောက်လက်တဖက်ထဲမှာတော့ အဖွားထည့်ပေးလိုက်သည့် ထမင်းချိုင့်ဆွဲခြင်း၊ ပခုံးမှာ ကျောင်းလွယ်အိတ် လွယ်ထားသေးသည်။

မိုးသံတွေ တဝုန်းဝုန်း ခုန်ဆင်းပြေးလာနေသည်။ ထီးကိုလွှင့်ပြီး မျက်နှာမော့ပြီး မိုးရေတွေ ခံယူရင်း ပြေးကစားချင်စိတ်က ဝင်လာပြန်သည်။ မဖြစ်သေး။ အမေ ရှိနေသော နေရာကို အချိန်မတိုင်မီ ရောက်အောင် လှမ်းရဦးမည်။ လမ်းဘေးတလျှောက် စီးနေတဲ့ မိုးရေမြစ်ကလေးထဲကိုတော့ ခြေဖျားလေးဖြင့် ခတ်ဆော့လိုက်သည်။ ဂါဝန်အနားသားတွေ ရေစင်ကုန်သည်။ မတတ်နိုင်၊ အမေ ဆူချင်ဆူနိုင်ပေမယ့် မိုးရေချစ်သောသူကတော့ ဒီမျှတော့ ဆော့ခွင့် ရှိရမည်ပေါ့။

ထီးကိုင်ထားတဲ့ လက်ကို အကြည့်ရောက်ရင်း လက်ပတ်နာရီပိစိလေးဆီ ကြည့်ဖြစ်သည်။ တံခါးပိတ်ချိန် ရောက်တော့မည်။ ခြေလှမ်းနှုန်းကို ထပ်မြှင့်ရင်း မောသလို ဖြစ်လာပြန်သည်။ အမေရှိရာ တောင်ကုန်းထိပ်မှ အဆောက်အဦးကို လှမ်းမြင်သည်တွင် အပြင်တွင် ရွာနေသောမိုးက ရင်ဘတ်ထဲ မြစ်ဖျားခံသလို ဖြစ်လာသည်ပဲ။

အသက် ၉ နှစ်သာ ရှိသေးသော သူ့အတွက် ဒီဘဝကို နေသားတကျ ဖြစ်နေတာက အဆန်းတကျယ်မဟုတ်။ သူ့အောက်တွင် ညီမလေးနှစ်ယောက်နှင့် မောင်လေး တစ်ယောက်ရှိသည်။ အကြီးဆုံးသူက အားလုံးမဟုတ်လျှင်သော်မှ အများအားဖြင့်တော့ ကိုယ်ပိုင်အချိန်တွေ ဖဲ့ထားခံရသည်ချည်း။

ခုလည်း သူ့မောင်လေးနှင့် အငယ်ဆုံးညီမလေး ဆေးရုံမှာ ကလေးရောဂါဖြင့် တင်ထားရသဖြင့် အမေက ဆေးရုံမှာ ရှိရသည်ပေါ့။ ဆိုက္ကားနင်းသော အဖေက ယစ်ရွှေရည်သည်သာ သူ့ဘဝ သတ်မှတ်ထားသလို မနက် ဆိုက္ကားနင်းထွက်တည်းက ညသိမ်းချိန်အထိ ခရီးသည်တင်နင်းလိုက်၊ ပိုက်ဆံရလျှင် ပြေးသောက်လိုက်ဖြင့် ရှိ၏။ အဘွား(အမေ့ရဲ့အဖွားလေးတော်စပ်သည်)က ဘွားရယ်၊ အဖေရယ်၊ သူရယ်၊ ညီမလေးရယ်အတွက် ဟင်းချက်၊ လျှော်ဖွပ်၊ သိမ်းဆည်းပြီး ဆေးရုံမှ အမေနှင့် ညီမလေးတို့အတွက် ချက်ပြုတ်ပြင်ဆင်ပေးသည်။

သူနှင့် သူ့အောက်က ညီမလေးက မနက်ကျောင်းသွားပြီး ကျောင်းပြန်လျှင် ရေချိုးပြီး ဘွား ချက်ထားသော ထမင်းကို စား၊ ပြီး လွယ်အိတ်လွယ် ထမင်းချိုင့်ဆွဲခြင်းကို ယူ၍ ခုလိုပဲ အမေ့ဆီ သွားပို့ရသည်။ နေ့လယ်စာကိုတော့ အဖေ သွားပို့ပေးသည်။ အဖေ ဈေးဖိုးပေးချိန်ကို မူတည်၍ ချက်ရသည်မို့ အချိန်က မမှန်၊ စောဖို့ထက် ဆေးရုံဝင်းတံခါး မပိတ်မီလေးတောင် သိပ်မရှိခဲ့ပေ။ တာဝန်ကျ ဂိတ်မှူးတွေကို အမြဲတမ်း တောင်းပန်၍ ဝင်ခွင့်တောင်းရသည်ချည်း။

မိုးရေစိုသဖြင့် ပခုံးက ကျောင်းလွယ်အိတ်ထဲက ကျောင်းစာအုပ်တွေ စိုနေလောက်ပြီ။ အမေ့ဆီရောက်လျှင်တော့ အမေက ခြောက်အောင် လုပ်ပေးလိမ့်မည်။ ဘယ်ရောက်နေနေ အမေ့နားတွင်သာ နေချင်သည်။ အဖေနှင့် သူက မတည့်၊ ဒီအရွယ် ကလေးတစ်ယောက်နှင့် အဖေက မတည့်ဟုသည်မှာ မသိဆိုးရွားနိုင်ပေလိမ့်မည်။ မနက်ကျောင်းသွား၊ အဘွားပေးလိုက်သော ထမင်းကို စားပြီး ကျောင်းပြန်လျှင် ပန်းကန်ဆေး၊ ရေခပ်၊ ရေချိုး၊ ညစာစားပြိး ကျောင်းစာကျက်ဖို့ အချိန်တွင် အဖေ့၏ ထွေလီကာလီ ယစ်ထွေနေမှုကို နားထောင်နေရမည်။ နားမထောင်ဘဲ စာပဲကျက်လျှင် သူ့ကို အရေးမစိုက်ဟူ၍ ဇက်ပိုးအုပ်လိမ့်မည်။ အဖေနှင့် မျက်နှာချင်းမဆိုင်ချင်ပါ။ ကျောင်းက သင်ပေးလိုက်သော ပုစ္ဆာများကို မရှင်းလျှင် အဖေ့ဆီ သွားမေး၍ မရ။ နင်တို့ ကျောင်းနေတာက အလကားပဲ၊ ပြီး ဘာမှ ရလာမှာ မဟုတ်ဘူးဟု နာကျည်းသံဖြင့် ပြောပြီး လက်ထဲက ကျောင်းစာအုပ် လွှင့်ပစ်ခံရနိုင်သည်။ အမေကတော့ သူ တတ်သလောက် ရှင်းပြတတ်သည်။ ခု အမေက ဆေးရုံက ညီမလေးတို့နားမှာမို့ အမေရှိရာ အမေ့နားမှာနေရင်း ကျောင်းစာ လုပ်ရမည်။ အိမ်က ညီမလေးကတော့ အငယ်ပီပီ ညဆိုလျှင်တော့ အိပ်နေလိမ့်မည်။ ကျောင်းမှာဆို မကစားရ၍ ကျောင်းသိပ်မသွားချင်ဘူးဟုလည်းး ခဏခဏ ပြောတတ်သေးသည်။ စာမရရင် အမေက ကျောင်းမထားပေးတော့ဘူးဟု အမေပြောဖူးသည်ကို ညီမလေးက မှတ်ထားပုံရသည်။

လျှောက်ရင်း တွေးရင်းဖြင့် အမေ့ရှိရာ ဆေးရုံဝင်းအဝသို့ ရောက်လာသည်။ ဝင်းတံခါး ဂိတ်မှူးကို တောင်းပန်ဖို့ မျက်နှာမော့လိုက်ချိန် အမေ့ကို ဂိတ်နားတွင်တွေ့သည်။ ခုနက မြစ်ဖျားခံစပြုနေသော မိုးရေမြစ်က ပျားရည်မြစ်အဖြစ် ရင်ထဲ ဖြတ်သန်းလေသည်။

အမေ ကြိုရောက်ပြီး ပြောထားနှင့်ပုံရသည်ပဲ။ အမေ့ကို ပြုံးကြည့်ရင်း အမေက လွယ်အိတ်နဲ့ ဆွဲခြင်းကို ယူသည်။ တကိုယ်လုံးနီးပါး မိုးရေရွှဲနေသော သူ့ကို အင်္ကျီလဲရန် ပြောပြီး ဆေးရုံလူနာဆောင် အိမ်သာခန်းတွင် သွားလဲခိုင်းသည်။ သူ လဲပြီး ပြန်အထွက်လာမှာ အမေက လွယ်အိတ်ထဲက စာအုပ်တွေကို ခြောက်အောင် လုပ်ပေးနေသည်။ ညီမလေးနှင့်မောင်လေးက တစ်ယောက် တစ်ကုတင်စီ ဆေးပိုက်တန်းလန်းဖြင့် အိပ်နေကြသည်။

ဘယ်အချိန် ဆေးရုံက ဆင်းရမည်လဲ။ မသိပေမယ့် ဒီအခိုက်အတန့်လေးကို ဆွဲဆန့်ထားချင်သည်။ အဖေနှင့် တွေ့ရမည်ကို စိုး၍ ဒီဆေးရုံမှာ အချိန်ကြာကြာ နေချင်သည်။ ကျောင်းသွား ကျောင်းပြန် ပြီးလျှင် ဆေးရုံကိုလာ။ ဒီခရီးက သူ့အတွက် ဝေးပေမယ့် အဖေ့နှင့် ဝေးဝေးမှာ နေရသဖြင့် နားမပူရ။ အမေ့နားရှိရသဖြင့်လည်း စိတ်ချမ်းသာရသေးသည်။ စာမရလျှင် အမေနားလည်သလောက် ရှင်းပြမည်။ ပြီးလျှင် အမေနှင့် တူတူ ထမင်းစားပြီး အမေ့နား ကပ်သီးကပ်သပ် ကွေးအိပ်ရတာကိုလည်း သဘောကျသည်။

တခါတရံတော့ အဖေ ဆိုက္ကားသိမ်းပြီးချိန် ရောက်လာတတ်သေးသည်။ သူ ရောက်သည့်အချိန်တောင် ဆေးရုံဝင်းတံခါး ပိတ်နှင့်ပြီမို့ အဖေရောက်လာချိန်တွင် မည်သို့ပြော၍ ရောက်လာရသည်မသိ၊ အဖေရောက်လာလျှင်တော့ အပြင်ဘက် ထိုင်ခုံရှည်မှာသာ ထိုင်လျက် အဖေ့နားမှာ အိပ်ရသည်ပေါ့။ ဒီအခါ အဖေ့နားမှာ ရှိရသည့် ထုံးစံအတိုင်း စာမကျက်ရချေ။ မနက်ကျရင် အဖေနှင့်တူတူပြန်ရသည်။ ခါတိုင်း သူပြန်နေကျလိုမျိုး လာခဲ့သည့်လမ်းအတိုင်း မဟုတ်တော့။ အနည်းငယ် လှမ်းသော လမ်းဘက်မှ အဖေ့ဆိုက္ကားဖြင့် ပြန်ရသည်လေ။

အဖေနှင့် အတူရှိချိန်များထဲတွင် ဆေးရုံမှ အိမ်သို့ တူတူပြန်ရသော ထိုအချိန်ခဏလေးကိုသာ မက်မောလှသည်။ အဖေ အရက်မသောက်ရသေးသဖြင့် သူ့ကို ဆိုက္ကားပေါ်တင်ရင်း ကြည်ပြုံးစွာ စကားပြောနေတတ်သော အဖေ့မျက်နှာကို ကြည့်မဝချင်။ ကျန်အချိန်များတွင်တော့ အဖေ့နား မနေချင်လှ။ မတည့်အတူနေသော သားအဖ ဖြစ်ပါသည်။

အိမ်ပြန်ရောက်လျှင် ကျောင်းသွားဖို့ ပြင်ဆင်ပြီး အဘွားပြင်ပေးသမျှ စားကာ ညီမလေးနှင့် ကျောင်းသွားမည်။ ကျောင်းခန်းထဲ တတ်နိင်သလောက် မှတ်ရမည်။ မရှင်း၍ ပြန်မေးရန် လူမရှိသော သူ့မှာ ကျောင်းစာသင်ချိန်သာ အားထားရသည်။ သူ စာတတ်ချင်ပါသည်။ ညီမလေးနှင့်မောင်လေးကို ကုပေးနေသော ဆရာဝန်ကြီးများလို ဖြစ်ချင်လှသည်။ ဆရာဝန်များရှိလို့သာ မောင်လေးနှင့်ညီမလေး အသက်ရှင်နေရခြင်းဖြစ်သည်။ ပိုက်ဆံကို ခြစ်ခြုတ်ရှာနေရသော ဘဝထဲကမို့ ဆေးကုစရာ ငွေမရှိသည့်အချိန်တွင် ထိုဆရာဝန်များ၏ စေတနာတို့ကြောင့် ညီမလေးနှင့်မောင်လေး ဆေးကုခွင့်ရခဲ့ရသည်။ သူ ဆရာဝန် ဖြစ်ချင်ပါသည်။ လူနာများကို မရွံမရှာ ကိုင်တွယ် ပြုစု ကုသပေးတတ်သော၊ မျက်နှာချိုသော၊ ကြင်နာတတ်သော ဆရာဝန်များကို လေးစား အားကျလှသည်။ ခုချိန်မှာတော့ စိတ်ကူးကို စိတ်ကူးထဲတွင်ပင် ထားရဦးမည်သာ…..

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

နွေ

2011-04-22T16:03:00.002+07:00

ရိုးတံကျဲကျဲ
ပင်အိုတွေ အလှကိုယ်စီ တွဲလို့
အသွေးမကွဲတော့တာက
အဝေးက လိပ်ပြာနဲ့ အနီးက ရွက်ဝါ။
ဖူးပုရစ်အစီအရီနဲ့
လွမ်းဘွဲ့တွေ ညီခဲ့တာ
ချစ်စရာ့ ဒီနွေ
သစ္စာရယ် မဆိုခဲ့ပါဘဲ
နွေဆိုတာ ပူနေဖို့ချည်းသာပ။
ဥသြ နဲ့ နွေ
ဘယ်သူပြိုင်လို့ ဘယ်သူနိုင်နိုင်ပေါ့။
တစ်နှစ်ထက် တစ်နှစ်တိုး
အန်တုဖို့လည်း အခက်ဆိုး
အပူနဲ့ အငွေ့စပ် ဒြပ် ဖြစ်ပေမယ့်
မတတ်သာတော့ လှုပ်ခတ်တာကပဲ ပိုပိုတိုးလာတယ်။
နွေအလှကို ဘယ်သူဖျက်
ဘယ်သူစွက်လိုက်လို့ နွေပျက်
နွေကကြိုးဆက်ဖို့ ခက်ပြီ။
ချစ်စရာ ဒီနွေထဲ
အနှစ်နှစ်အလီလီ ဖြတ်သန်း
ဆက်လှမ်းဖို့ နွေ လှပါရစေ။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

ပင့်ကူနဲ့ အိမ်

2011-03-11T18:46:00.002+07:00

ရင်ဘတ်ထဲ ပွေ့ထားရင်းနဲ့
သိမ်း ထုတ် ငင် ယှက်
လက်တွေနဲ့ ယက်ခဲ့ရတယ်။
အမှောင်ကို ကြို အရိပ်ကိုခိုရင်း
ရေတွေစိုမှာလည်း စိုးခဲ့ရတာပါ့။
တမျှင်ပြီး တမျှင်တိုး
ခြေထိုးရင်တောင် မပြိုဘူး ထင်ခဲ့တာလေ။
ရင်ဘတ်တွေ နာအောင် အန်ထွေးရင်း
ပိုက်ထားမိသမျှတွေ လျှံကျနေအောင်
ဒီအိမ်ကလေးက ခံနေပါ့မလား။
မဝံ့မရဲပေမယ့်
တွန့်ဆွဲလည်း မနေခဲ့ပါဘဲ
ဝင်ရပ်ကာ အမောဖြေမယ်ကြံ
လေသင်တုန်ဲး မာန်အဟုန်နဲ့
ကျီစာသန် ပြန်အဝှေ့မှာတော့
ဟန်ကလေးနဲ့ တောင် နှုတ်မဆက်
ရုတ်တရက်ပဲ ခွဲခဲ့ရတာလေ။
ပြန်ဆင်မယ် ဒီစိတ်ကူးတွေနဲ့
မာန်ကြိုတင် မိန့်မူးပေမယ့်
ယိမ်းနွဲ့အား မမျှလေသမျှ
တိတ်တိတ်သာ အရိပ်လေးထဲ
ခပ်မဆိတ်ဘဲ ရပ်နေပါရစေတော့။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

ဘဝဆိုတာ

2011-02-05T19:33:00.002+07:00

မေ့ချင်ရဲ့နဲ့ အမေ့ခက်နေတဲ့
မေ့လည်း မမေ့နိုင်တဲ့
ဘဝဆိုတာ...
ပြန်ပြောင်းယူမရတဲ့ ပုစ္ဆာ ... ။
ဘဲ့ပြားပင်ဆန်ခဲ့တဲ့ နှလုံးသားက
ယိမ်းလည်း ယိမ်း၊ တိမ်းလည်း တိမ်းဖူးပါရဲ့။
နေနဲ့ လည်း မစိမ်းခဲ့သလို
လေအနွဲ့မှာလည်း ဟိုဒီလေး... ယီးလေးခို
မြေအပဲ့ကလေး ပြိုမှာတောင် စိုးခဲ့ရတာပါ့။
သယောင်းနေတဲ့ လမ်းမှာလည်း
အလှမ်းခက်ရင်း ဆက်လှမ်း
ကြမ်းနေခဲ့တဲ့ ဝမ်းစာ။။။
ဒီမိုး ဒီနေ ဒီလေနဲ့အားပြု
ဘဝကို ကိုယ် စိတ်မခုခဲ့ဖူးဘူး။
တခုပြီး တခုတိုးတဲ့ ဂဏန်းသင်္ချာလို
ကိန်းတန်ခိုးတွေ စိုး မနေခဲ့ပေမယ့်
အခြေအနေတွေလည်း
တစုပြီး တစု တိုးရင်း ထပ်ထပ်ဆိုး
ဘဝကို အစ ပြန်ပျိုးချင်တယ်။
နေဖို့နဲ့ သေဖို့ ဘယ်ဟာက ပိုခက်မှန်း
သိပ်မသိခဲ့သမျှ
ခက်ခက်ခဲခဲတွေက ဝေါဟာရ မလိုဘဲ ပြိုဆင်း
ကိုယ် ငိုချင်းတော့ မချခဲ့ဖူးဘူး ထင်တာပဲ။
နင်းခဲ့တဲ့လမ်း တခုစီကို ဖြန့်.ဆက်.. စမ်း...ဦး တော့
အစ ကို ဘယ်အခါမှ ပြန်မရနိုင်ပါလားကွယ်။
တကယ်တော့လည်း
မေ့ချင်ရဲ့နဲ့ အမေ့ခက်နေတဲ့
မေ့လည်း မမေ့နိုင်တဲ့
ဘဝဆိုတာ...
ပြန်ပြောင်းယူမရတဲ့ ပုစ္ဆာ ... ။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

အရောင်တွေနဲ့ ရေးတဲ့ကဗျာ

2010-12-27T10:14:00.003+07:00

ကင်းဘတ်ဖြူ တချပ်
ဆေးတစ်ခွက်နဲ့
စုတ်ချက်တွေဆီ သွားမယ်။
အာရုံကိုနောက်ခံ
အပြောက်နဲ့ အကြည်
အပီနဲ့ အလင်း
ထင်းနေတဲ့ အမှောင်တွေကြား
လျားလျားညီအောင် မြင်ရမယ်။
အထင်ကရ အရိပ်တွေထဲ
အတိတ်တွေလည်း မျောပါ ..... ဗလာဆိုတာလည်းရှိ
သမ္ဘာတွေလည်း မထိတထိလေ။
ခေါင်းညိမ့် ခေါင်းခါ လက်ပြ ပြုံးဖို့ ဝေးလို့
ဟန်ပြတွေလည်း သုံးစရာမလို
ဆေးစက်တွေထဲကို ဝင်
စုတ်ချက်နဲ့ အသက်ရှင်
ပြေ... ရင့် ... ဖျော့ ... ပြင်း ..
စင်းနေအောင် ဝပ်ဆင်း
စာတစ်လုံးမှ မခင်းဘဲနဲ့
အရောင်တွေနဲ့ အသက်သွင်း
ဟော.. ဒါ လည်း ကဗျာပါပဲ....။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

၁၉၉၇ ခုနှစ် ကာလတခုဆီက

2010-12-19T15:23:00.002+07:00

အိပ်ရေးမဝတဝ မျက်လုံးကို ပွတ်ပြီး အမြန်ထ ရသေးသည်။ အမေ ဘယ်ရောက်နေလဲ။ သြော်... ညီမလေးတွေ နားမှာပဲ။ နေဦး ဒီနေ့ ဘာလုပ်ရမှာပါလိမ့်။ ရေချိုးသွားရင် အချိန်မီမှာ မဟုတ်တော့ဘူး။ ဒီတိုင်းပဲ သွားတော့မယ်။ အမေက အိပ်နေရင်းနဲ့ သမီး ထမင်းကြမ်းစားမှာလား။ ကောက်ညှင်းပေါင်းလေး ဝယ်စားပါလားလို့ လှမ်းပြောသည်။ အမေက စားစေချင်ပေမယ့် ကောက်ညှင်းပေါင်း တပုံ ငါးကျပ်က ကိုယ့်တွက် ထမင်းတထုပ်ရသည်။ ဆန်တစ်ဗူးစာ မပြည့်တပြည့်ရသည်။ ဆားအိုးထဲက ဆားခပ် လက်ဖဝါးပေါ်ပုံ ညာလက်ညှိုးနဲ့တို့ ပါးစပ်ထဲထည့်ပြီး သွားတိုက်လိုက်သည်။ (အင်း သူတို့တွေ တိုက်တဲ့ သွားတိုက်ဆေးက ဘယ်လိုနေပါလိမ့်)
တက်သုတ်ရိုက် မျက်နှာသစ်ပြီး ပဝါနဲ့သုတ်.. ဟော လက်က နာရီဟောင်းလေးထဲ (၇)နာရီထိုးတော့မည်။ အမေကို ပါးစပ်က နှိုး၊ လက်က ထမင်းကြမ်းထည့် ဆားဖြူး ပြီး လွေးဖို့ တဆက်တည်း လုပ်ရသည်။ ပြီး အမေ့ကို နှုတ်ဆက်ရင်း ခေါင်းဆံပင်ကို သားရေကွင်းနဲ့ ဖြီးစည်းလိုက်သည်။ အမေ..သနပ်ခါးကုန်နေပြီ။ နေဦး မနက်ဖြန်လောက်တော့ လိမ်းလို့ရသေးတယ်။ ညနေ အဲဒီသနပ်ခါးသယ် လာရင် နှစ်ကျပ်ဖိုးလောက် ဝယ်ထားပေးနော်။ သမီးက မီးနဲ့ တနေကုန် နှစ်ပါးသွားနေတာ။ ခုလောက်လူးထားရင် ညနေဆို မရှိတော့ဘူး။ နော်အမေ...။လို့ လှမ်းပြော လက်က သနပ်ခါးခွက်(အမေပြောတော့ အဲဒါ ကြေးခွက်ဆိုပဲ..ကိုယ်တို့သိတာ အမေဝယ်လာတဲ့ သနပ်ခါးစက်သွေးဖတ်တွေ ထည့်ထားလို့ သနပ်ခါးခွက်ပဲ၊ ဟုတ်တယ်လေ ကြေးရောင်မှ မမြင်ရတာ) ကို နှိုက်ပြီး မျက်နှာပေါ်ကို ဘဲကျားမကအောင် ထူထူလိမ်းရသေးသည်။
အမေရေ သွားပြီနော်။ ရေမခပ်နေနဲ့ဦး။ သမီးဖြည့်ထားတယ်။ အဝတ်တွေလည်း လျှော်မနေနဲ့ဦးနော်။ အလုပ်ပိတ်ရက်မှ လျှော်မယ်။ ဟို အငယ်မကို ဆန်ဝယ်ဖို့ နှိုးတော့နော်။ အမေတစ်ယောက်တည်း ကသီနေမယ်.. လို့ ပါးစပ်က ပြောပြောပြေးပြေးလုပ်ပြီး ခြေထောက်တွေက သိပ်လည်း မဝေး သိပ်လည်း မနီးတဲ့ အလုပ်ကို သွားဖို့ ထွက်ရပြီ။ လူကြီးခြေလှမ်းနဲ့ဆို ဒါ ဘယ်နှလှမ်းပဲ လှမ်းရမှာပါလိမ့်။ ကလေးခြေလမ်းဆိုရင်ရော။ နေပါဦးး.. ငါက လူကြီးလား ကလေးလား ဘာလဲ။ လူကြီးမဟုတ်သေးဘူးထင်တယ်။ ငါ့ခြေထောက် ဒီလောက်မြန်တာ.. အဲဒီအန်တီတော့ မပြောလောက်ပါဘူး။ ဟူးးးးးး။အိပ်ရာထလည်း အမြန်။ မျက်နှာသစ်လည်း အမြန်၊ စားလည်းအမြန်၊ ခု သွားလည်းအမြန်၊ ဟိုရောက်ရင်လည်း လက်ကအမြန်လုပ်ရဦးမယ်။ အားလုံးအမြန်လုပ်နေရတာ။ သေရင်ေ၇ာ .. ဟုတ်သားပဲ သေတာကျတော့ နှေးနေတာပဲလား။ အဖေပြောတော့ ငါ့ကို မွေးတုန်းက မွေးရာပါ ရောဂါသည်မို့ ပိုက်ဆံနဲ့လူ ချိန်ရင် ပိုက်ဆံက ပိုလေးတယ်တဲ့။ ဘာလို့ မသေတာလဲ။ ခု မသေရင်လည်း နောက်သေမှာပဲဟာ..။ အဲဒီတည်းက သေလိုက်ပြီးရော..။
ကျွီ..။ ဟင် ကားဘရိတ်အုပ်သံပဲ။ ဟဲ့ကလေးမ ငယ်ငယ်ရွယ်ရွယ်နဲ့ စိတ်ကူးယဉ်နေလား။ သေတော့မလို့ ......အော်သံတွေ ညံသွားသည်။ ကြောင်တောင်တောင်လှည့်ပြီး ကားရှင်းမှ လမ်းကူးလိုက်သည်။ သေမှာ တွေးနေတာတောင် မသေရသေးဘူးနော်။ မဟုတ်သေးဘူးလေ.. သေချင်နေတော့ရော ဘာဖြစ်လို့လဲ...နင့်ဘယ်သူ ရိုက်နေလို့လဲ .. ကိုယ့်ကိုယ်ကိုယ် မေးပြီး ဘယ်သူမှ မရိုက်နေပါဘဲ ကိုယ်က ဘာလို့ သေချင်နေရတာလဲ။ သေရင် ငြိမ်းချမ်းသည်။ အပူတွေ ဝေးမည်။ ထပ်ဆုံဦးမည့် လောကဒုက္ခတွေကို ကင်းမည်။ ဒါပဲ။ အဲဒါကြောင့် သေချင်တာ။
ဟိုတွေးဒီတွေးနဲ့ အလုပ်ကို ရောက်လာသည်။ အမလေး လဲ့လဲ့ဝါ ဒီလောက်နောက်ကျရလား။ နင်တို့ ဒါကြောင့် ဒီလို ဖြစ်နေတာ..။ ဒီအန်တီက အသက်ဖြင့်မကြီးသေးဘဲနဲ့ ဘာလို့ ဒီလောက် မြည်တွန်နေတာလဲ မသိဘူး။ အလုပ်သမားက ငါပဲ ရှိတာကို။ (သိတယ်ဟုတ် စိတ်ထဲက ပြောလိုက်တာ) ရောက်တာနဲ့ သူတို့ လှီးဖြတ်ထားတဲ့ မုန့်ဗန်းကို ယူပြီး အပေါ်ထပ် တက်ခဲ့လိုက်သည်။ အလုပ်ရှင်အန်တီက ပလတ်စတစ်အိတ်တွေ မယူသွားဘူးလားလို့ မေးတာကို မနေ့က အကျန် အပေါ်မှာ ရှိသေးတယ်လို့ ဖြေရင်း မုန့်ဗန်းထဲက မုန့်တွေကို မျက်နှာလွှဲလိုက်ရပြန်သေးသည်။ ဒါလား မလိုင်ခဲ... ဂျုံမှုန့်ကို သကြားနဲ့ ရေထည့်ဖျော်ပြီး နို့မဖြစ်စလောက်လေးပဲ ထည့်ကျို ခဲအောင်လုပ်ထားတာကို မလိုင်ခဲတဲ့ ။ အရင်တုန်းက သိပ်ကြိုက်ခဲ့ဖူးတဲ့ မလိုင်ခဲမုန့်ကို ခုချိန်မှာ မြင်တောင် မမြင်ချင်တော့။ အင်းလေ မမြင်ချင်ရင်လည်း ကြည့်ပြီး လုပ်နေရမှာကိုက င့ါအလုပ်ပဲ။ သေချာထည့်ဦးမှပဲ။ မဟုတ်ရင် ငါ့ကို အခုရေ လျော့တယ်ပြောနေဦးမယ်။
လက်က စက်ရုပ်လို ဘယ်ဖက်က ပလတ်စတစ်အိတ်အဝကို ပွတ်ရင်းဖွင့်၊ ညာဖက်က မုန့်ကို နေရာကျအောင် အိတ်ထဲစီထည့်၊ ထည့်ပြီးတဲ့ မုန့်အိတ်ကို ညာဖက်လက်က ပစ်ချတာနဲ့ ဘယ်ဖက်လက်က နောက်အိတ်အသစ်ယူတာ တချိန်တည်း။ ဇက်ဆက်သလိုဆိုတာမျိုး။ မီးပုံးတော့ မလုပ်သေးဘူး။ မုန့်တွေ ကုန်မှ မီးထည့်တော့မယ်။ မဟုတ်သေးဘူးလေ။ ခဏနေ။ ဒီနားက ကလေးတွေ ကျောင်းသွားတော့မယ်။ ငေးလိုက်ဦးမှ။ .......
အလုပ်လုပ်နေရာ အရှေ့က ဝရံတာကလေးဆီ လှမ်းလိုက်ပြီး အောက်က (ဒီမလိုင်မုန့်ရုံက လမ်းကြားလေးတခုထဲမှာရှိတာလေ) အိမ်ကလေးတွေဆီက အလျှိုလျှိုထွက်လာလိုက်၊ ပြန်ဝင်သွားလိုက် အချင်းချင်းအော်ခေါ်လိုက် လုပ်နေကြတဲ့ အဖြူအစိမ်းဝတ်တွေကို ငေးမိသည်။

‘…အင်း သူတို့က ငါနဲ့ ရွယ်တူလည်းပါ၊ ငါ့ညီမလေးနဲ့ မောင်လေးအရွယ်တွေ လည်း ရှိ၊ ငါ့ထက်ကြီးတဲ့သူတောင် ရှိသေးတယ်။ သူတို့တက်သလို ငါလည်း တက်ချင်လိုက်တာ… ငါ့ကို အမေက ပြောသားပဲ။ နောက်နှစ်တက်ပေါ့တဲ့။ ဒီရှစ်တန်းအောင်ပြီး ကိုးတန်းတက်ရမှာက ဒီလိုပဲ တစ်နှစ်အောင့်လိုက်လို့ ရလို့လား။ စာတွေက ငါ မေ့သွားမှာလား။ ငါ့ထက်ငယ်တဲ့သူတွေနဲ့ တူတူတက်ရမှာပေါ့၊ အမ်.. ငါလည်း နှစ်ကျ မဟုတ်ဘဲနဲ့။ အိုး ငါ ဘာတွေးနေတာလဲ… ကျောင်းက နေရဦးမလား မနေရတော့ဘူးလား မသိသေးဘဲနဲ့….. အင်းးးး မနေရတော့ဖို့ များပါတယ်.. ဒီပုံစံအတိုင်းဆိုရင်….အမေက ကလေးမွေးဦးမယ်။ အဖေက ပြန်လာပါဦးမလား … ဟူးးးးးးးး…..’

အဲဒီလို ငေးကြည့်ရတာလည်း ဘယ်နေ့များမှ ပြီးမယ်မသိဘူး။ ငါလည်းနော်………

ဝရံတာကနေ အထဲကို ပြန်ဝင်လာ ကိုယ့်နေရာမှာ လုပ်လက်စ အလုပ်ကို ဆက်လုပ်ရသည်။ မုန့်တစ်ဗန်းကုန်ပြီ… နံရံထောင့်မှာ ကပ်ထားသော မီးပုံး (သံနဲ့လုပ်ထားတဲ့ ၆ လက်မအရှည်၊ ၃ လက်မလောက် အကျယ်ရှိပြီး ၈ လက်မလောက် အမြင့်ရှိတဲ့ လေးထောင့်ပုံ မီးဖိုအသေးစားလေး)ကို ကိုင်းက ကိုင်ပြီး အောက်ထပ်ဆင်း၊ မလိုင်မုန့်ကျိုနေတဲ့ ကောင်လေး(ကိုယ်နဲ့ ရွယ်တူပါပဲ) ဆီကနေ သူ့မီးဖိုက မီးကျီခဲကို ယူပြီး မြေအောက်ခန်းလို လုပ်ထားတဲ့ မီးသွေးလှောင်ကန်ထဲကို ဆင်းပြီး မီးသွေးယူရသည်။ တော်သေးသည်။ မီးသွေးအသစ်ဝယ်ဖြည့်ကာစမို့ မီးသွေးတုံးတွေ မကြေနေဘဲ ကောင်းနေသည်။ မီးသွေးကုန်ခါနီးလျှင် ၎င်းမီးသွေးကန်ထဲက မီးသွေးအမှုန် အကြေတွေ ကို ဇကာနဲ့တိုက်ယူ ပြီး ဇကာပေါ်တင်ကျန်နေသော မီးသွေးတုံး သေးသေးတွေကို သုံးရသည်။ လူက တကယ့် အိုးတိုက်ဖွဲပြာသည်ပုံစံအတိုင်း မီးသွေးမှုန်တွေနဲ့ လူးထားသလို တကိုယ်လုံး မှုန်မဲသွားမည်။ ကိုယ့်ပုံကိုယ် ပြန်ကြည့်မိလျှင် တဟဟား အော်ရယ်ရဦးမည်။ မဲတူးနေတာက ကိုယ့်ဘာကိုယ် ဘာရုပ်မှန်းမသိ၊ သနပ်ခါးအထူကြီးပေါ် မီးသွေးမှုန်တွေက ကပ်နေပြီး နှာခေါင်းအိမ်ထဲထိ ရောက်ကာ နှာစေး နှာချေလို့ နှပ်ညှစ်ရင်တောင် နှပ်ထဲမှာ မီးသွေးမှုန်တွေ ပါလာတတ်သေးသည်။

မီးပုံးဖိုလေးထဲ မီးထည့်ပြီး အပေါ်ထပ် ခုနက မုန့်ထည့်ထားသည့်နေရာအလယ်မှာ မီးပုံးကို ချလိုက်သည်။ မီးပုံးမျက်နှာပြင်က သံပြားဆိုတော့ အချောလေ။ အထဲမှာ မီးထည့်ထားတော့ အပြင်က သံမျက်နှာပြင်က ပူနေပြီဆိုလျှင် မုန့်ထည့်ထားသည့် ပလတ်စတစ်အထုပ်လေးကို ဘယ်လက်က ယူရင်း ပိတ်မယ့်နေရာကို ခေါက်၊ ညာလက်က မုန့်ထုပ်ကို ယူပြီး မီးပုံးမျက်နှာပြင်မှာ ခေါက်ရာကို လက်ညှိုးလေး ခံရင်း ကပ်ပိတ်၊ ဘယ်လက်က နောက်တစ်ထုပ်ယူ၊ ညာလက်က ပိတ်ပြီးသား မုန့်ထုပ်ကို ဘေးပစ်ချချိန် နောက်တစ်ထုပ်ခေါက်ပြီးသားဖြစ်၊ အင်းးးးးး ဘယ်နဲ့ညာ ဟန်ချက်ညီဖို့ ဒီလိုပဲ ဘုရားသခင်က ပေးထားတာဖြစ်လိမ့်မယ်။ သူ့ဟာနဲ့သူ အဆင်ပြေနေအောင် လုပ်လို့ ရနေတာပဲလေ။

မု့န်ထုပ်တွေ မီးပိတ်လို့ ကုန်ခါနီးမှာ နောက်တစ်ဗန်း အသစ်ထည့်ရန် အောက်ထပ်မှ အန်တီက လှမ်းခေါ်တတ်ပြီ။ ‘…လဲ့ဝါရေ မြန်မြန်လာယူ.. တော်ကြာ အေးကုန်လို့ မုန့်တွေ မလှဘဲ နေမယ်….’ မုန့်တွေ မလှဘူးတဲ့လား။ မုန့်က အစစ်မှ မဟုတ်တာ..။ ဘယ်လိုလုပ် ကြာကြာအလှခံမလဲ..အင်း မလိုင် မလိုင်…. ဒါနဲ့ပဲ နောက်တစ်ဗန်းယူ အိတ်သွတ် မီးပိတ်၊ မီးပိတ်လုပ်တော့ ညာလက်ညှိုးက မီးလောင်ပြီး အမာရွတ်လည်း မဟုတ်ဘဲ ကြာတော့ မာမာမဲမဲကြီး ဖြစ်နေသည်။ …သူများကို လက်ညှိုးထိုးပြောရင် ဟိဟိ ရယ်စရာကြီးနေမှာ။ အမယ်.. ဘယ်သူ့ကို ငါက လက်ညှိုးထိုးပြောရမှာလဲ။ ခုက သူများက လက်ညှိုးထိုးတာ ခံနေရတာလေ။ ဇယ်ဆက်တာ ဘာမှန်းတော့ မသိ။ စကားအရဆိုရင် အလုပ်များများ တဆက်တည်း လုပ်ရတယ်ဆိုရင် အဲလိုပြောကြတာပဲ။ ဒါဆို ငါက ဇယ်ဆက်နေသလိုပေါ့။

နေ့ခင်းရောက်တော့မယ်။ အမေ ထမင်းလာပို့တော့မယ်။ ဗိုက်ကလည်း ဆာချင်နေတာပါပဲ။ အင်း လက်စသတ် မီးပိတ် မြန်မြန်လုပ်မှပဲ။ ဘေးနားက ကိုယ်အိတ်သွတ် မီးပိတ်ပြီး မုန့်ပုံက အပုံကြီးဖြစ်နေပြီဆိုရင် ဒါ နေ့ခင်းရောက်လို့ ထမင်းစားချိန်ဖြစ်တော့မယ်ဆိုတာပဲ။ နာရီတောင် ကြည့်စရာမလို၊ အမေ… အမေ… ရောက်ပြီထင်သည်။ အောက်ထပ်က အန်တီက အမေ့ကို လှမ်းနှုတ်ဆက်သည်။ လဲ့ဝါတို့အမေ ဒီနေ့ တယ်စောပါလား။ ဧကန္တ လဲ့ဝါ အလုပ်လုပ်မလုပ် လာချောင်းတာ ထင်တယ်။” ဟွန်းးး ဒီအလုပ်မလုပ်ရင် ဘာနဲ့ ထမင်းသွားစာရမလဲ။ လုပ်ချင်လွန်းလို့ လာလုပ်နေတာကို။ အမေက င့ါကိုလာချောင်းစရာလား။ ဒီအန်တီတော့။ “ မဟုတ်ပါဘူး၊ ညီမရယ်။ သမီးကြီးအတွက် စောစောလာပို့တော့ သူ စောစောစားရတာပေါ့။ အိမ်မှာလည်း အလုပ်က မရှိဘူးလေ။ သူ့ကိုလည်း ဝိုင်းလုပ်လို့ရတာပေါ့။ အစ်မမှာလည်း ဒီကိုယ်ဝန်နဲ့ ဆိုတော့ ကြာကြာက မထိုင်နိုင်ဘူး မို့လား။ မဟုတ်ရင် သူနဲ့အတူတောင် ထိုင်လုပ်ချင်သေးတယ်။ ကိုယ်တွေက များများလုပ်လေ ပိုရလေပဲလေ။”

အမေယူလာတဲ့ ထမင်းကို ချိုင့်ဖွင့်ရင်း အမေစားပြီးပြီလားမေးတော့ အငယ်တွေနဲ့တူတူ အိမ်မှာ စားပြီးပြီတဲ့။ ကိုယ်ထမင်းစားနေချိန် အမေက မုန့်မီးပိတ်ပြီးသားတွေကို တံဆိပ်စာရွက်လေးတွေ ထည့်နေသည်။ ထမင်းစားပြီး မေမေနဲ့ တူတူထည့်၊ မုန့်အသစ်ရှိသေးရင်လည်း မုန့်အသစ်ကိုထည့်။ ပြီးတာတွေကို ဆယ်ထုပ်တစ်တွဲဖြစ်အောင် ပလတ်စတစ်ကြိုးကို မြွေရေခွံချုပ်အပ်လို အပ်ကြီးကြီးရဲ့ ဖင်ပေါက်ကနေ ထည့်ပြီး မုန့်ထုပ်တွေကို သီရသည်။ အဲဒီဆယ်ထုပ်တစ်တွဲမျိုး ငါးတွဲပြည့်မှ ကိုယ့်လုပ်ခ တစ်ကျပ်ရလေသည်။ ညနေ ညီမလေး ကျောင်းကပြန်လာချိန်ကျ ညီမလေးက မုန့်ထုပ် ကူတွဲ ကူထည့် လာလုပ်ပေးသည်။ အမေက ပြန်ပြီး ညနေစာကို ဆန်ဝယ်သွားရင်း ပြန်စီစဉ်မည်။ ပြောမယ့်သာပြောရ။ အမေချက်မယ့်ဟင်းက ကိုယ်သိနှင့်ပြီးသား အရွက်ကြော်တခုခု ဒါမှမဟုတ် ဆားအချိုမှုန့်ခတ်ထားတဲ့ ဟင်းချိုရယ် ငါးခြောက်ဆီလှိမ့်ရယ် ဒါပဲ ဖြစ်မည်။ သိပ်တော့ မထူးဆန်း။ အချိန်တန်လို့ စားဖို့ အဆင်ပြေရင် ရပြီ။ အဖေရှိစဉ်က မစားခဲ့ရချိန် ဖြစ်ခဲ့ဖူးသော ဒေါသ ဝမ်းနည်းမှု မျက်ရည်တွေ ထပ်မဖြစ်ရင် တော်ပြီ။

ညီမလေးနဲ့တူတူ လုပ်ရင်း ညနေကို ကျော်လို့ ညရောက်လာပြီ။ နေဝင်တာ မမြင်ရ၊ နေထွက်တာ ကိုယ်မသိ၊ ဘဝဆိုတာကိုလည်း ဘာမှန်း မသိသေး။ မနက်မျက်လုံးဖွင့်လို့ အမေ့ကို တွေ့ရရင် တော်ပြီ။ မနက်နှင့်ညနေ ထမင်းမှန်မှန် စားရရင်တော်ပြီ၊ ဘာကိုလိုချင်ခဲ့လို့ ကိုယ်က ဘာမှ မရဖူးတာ…။ ညီမလေးနဲ့ မောင်လေး ကျောင်းမှ လိုအပ်တာကို ပေးနိုင်ဖို့၊ အမေ မီးဖွားနိုင်ဖို့၊ အိမ်က အငယ်တွေ အချိန်မှန်စားရဖို့ ဒါပဲ လိုသည်။ အဖေက ပြန်လာမှာလား။ ဘယ်တော့မှလဲ၊ လက်ရှိအငယ်ဆုံးညီမလေး ငါးနှစ်အရွယ်လေးကတော့ ဖေဖေ့ပတ်စ်ပို့ ပုံ သေးသေးလေးကို ကြည့်ပြီး သတိရတယ်ဟု ခဏခဏ ပြောတတ်သည်။ ကိုယ်ကျတော့ သတိရသည်လည်းမဟုတ်၊ မရဘူးလည်း မဟုတ်၊ ဖေဖေရှိစဉ်ကလည်း ဒီလိုပဲ နေ့တိုင်းထမင်းစားရဖို့ မေမေနဲ့အတူ မေမေလုပ်သမျှတွေ လိုက်လုပ်ရသည်။ ဖေဖေရှိသည် မရှိသည်က ကိုယ့်အတွက် ဘာမျှ မဖြစ်သော ခံစားမှုသာ ဖြစ်သည်။ ခု ဖေဖေက ထွက်သွားပြီ။ သွားတာတောင် မသိအောင် သွားသည်။ အဖေသွားပြီမှန်း သေချာသိသောအခါ မေမေက ငိုသည်။ ငိုမှာပေါ့လေ၊ သူက ကိုယ်ဝန်နဲ့ဟာ…။ ကိုယ်အပါအဝင် ကလေးငါးယောက်အပြင် လက်ရှိကိုယ်ဝန်နဲ့ မေမေ့ကို ဖေဖေက မပြောမဆို ဒီအတိုင်း သွားရက်သည်။ စားဖို့ သောက်ဖို့ ကလေးမွေးဖို့ ကိုယ်နဲ့ညီမလေး မောင်လေး သုံးယောက်တို့ ကျောင်းနေဖို့ ဘာမှကို မစီစဉ်ပေးခဲ့။ အဖေ ရက်စက်ပါသည်။ သို့သော် ကိုယ်က မေမေ့ကို ကြည့်ကာ မငိုဖြစ်ခဲ့။

ဖေဖေသွားချိန်တုန်းက ကျောင်းတွေ ဖွင့်ခါနီးဆဲဆဲ၊ ကိုယ့်အတွက် ကျောင်းအပ်ခ ထောက်ပံ့ကြေးကိုတော့ (မိဘနှစ်ပါးလုံးရှိသည်မို့ ကိုယ်တုိ့ မောင်နှမ သုံးယောက်လုံး ကျောင်းခထောက်ပံ့ကြေး တဝက်စီ) ရပ်ကွက်ဘာသာရေးကျောင်းက ရထားပြီးပြီ။ ပေါင်းလိုက်မှ အငယ်နှစ်ယောက်အတွက်သာ လောက်မည်။ အမေ့မှာ ခါတိုင်းနှစ်တွေလို နောက်တဝက် ထပ်ထည့်စရာ အပိုထားငွေ မရှိတော့မှန်း ကိုယ်က နားလည်နေသည်။ ဒီတော့ ဒီနှစ်ကျောင်းကို သမီး မနေသေးဘူးလို့ ပြောလိုက်ရသည်။ အမေကလည်း သမီးတို့အဖေ ပြန်လာရင် ဒါမှမဟုတ် ပိုက်ဆံပို့ရင် သမီး နောက်နှစ် ပြန်နေရမှာပါကွယ် လို့ တိုးတိုးလေး ဖြည်းဖြည်းလေး ပြောသည်။ အမေ ဝမ်းနည်းရှာမည်။ အမေ့သမီး ဒီသမီးကြီးနာမည်ကို အမေ ခဏခဏ ဂုဏ်ယူသည်။ တဘဝလုံး မျက်နှာငယ်ခဲ့ရသော အမေ.. ဒီသမီးစာတော်လို့ လဲ့လဲ့ဝါတို့အမေလို့ တခွန်း အခေါ်ခံရတိုင်း တခါ မျက်နှာကြီးသည် တဲ့။ ခု အမေ့သမီး ကျောင်းထွက်ရပြီ။ နောက်နှစ် ပြန်နေရမည် ဆိုသော အမေ့စကားကို မယုံ၍ မဟုတ်၊ ကျောင်းနေအရွယ်တလျှောက် ကျောင်းကို စောစီးစွာ ကျောခိုင်းရမည်ဟု ကိုယ်က ဘယ်တုန်းကမျှ မတွေးဖူးခဲ့။ အချိန်မရှိသည့်ကြားက ကျားကုတ်ကျားခဲ(စာမရှင်းလျှင် ပြန်မေးရမည့်သူမရှိ) ကိုယ့်ဘာကိုယ် ကြိုးစားနေခဲ့ရသည့် ကိုးနှစ်ကျော်သက်တမ်းကို ခု ပြန်တွေး ခု ဝမ်းနည်းသည်။ ကိုယ်က ကျောင်းမနေရတော့ဘူး ဟု အတတ်သိလျက် တိတ်တိတ်လေး အမေ မသိအောင် ငိုခဲ့ပါသည်။

အဲလိုပဲ အလုပ်တွေလုပ်ရင်း ညီမလေးကို ကျောင်းစာမှန်မှန်လုပ်အောင် ပြောရင်း ည (၁၀)နာရီကျော်လျှင် မုန့်ထုပ်အားလုံး တွဲပြီးလေပြီ။ မီးပုံးကို အောက်ထပ် မီးဖိုထဲမှာ သွားသွန်၊ မီးငြိမ်း၊ မုန့်တွဲတွေကို ကတ်ထူပုံး(ဆန်ပုံး)ထဲ ရေပြီးထည့်၊ ပြီးရင် ရွက်….. ပုံးထဲ မဆံ့သော မုန့်တွဲနည်းနည်းကို ညီမလေးကို ပေးဆွဲ၊ မုန့်ရုံပိုင်ရှင်၏ အိမ်သို့ ရွက်ပို့ရသည်။ ထိုအိမ်ရောက်လျှင် ပိုင်ရှင်ညီမ ဟိုအန်တီက အတွဲရေပြီး အတွဲအလိုက် ပိုက်ဆံရှင်းပေးမည်။ မနက် (၇)နာရီတည်းက ည (၁၀)နာရီအထိ ထိုင်လုပ်ရသော လုပ်ခမှာ ၁၅၀ ကျပ်ကျော်ကျော်ရလေသည်။ နောက်နေ့အတွက် မုန့်တွဲရန် ပလတ်စတစ်ကြိုးကို (အမျှင်ခွဲပြီး တတွဲစာအရွယ် ဖြတ်ထုံးချည်ရန်) အန်တီက ပေးသည်ကို ယူပြီး ပြန်ရပြီ။

အိမ်ပြန်လာရင် မှောင်နေပြီးဖြစ်သော လမ်းကို အဖေပြောဖူးသော မဟူရာမြိုင်မြို့တော် ဆိုသော စကားလေးကို အဖေအလွမ်းပြေ ပြောရင်း ပြန်လာမည်။ (ဒီညီမလေးက အဖေကို ချစ်သည်လေ) ကိုယ့်လက်ကို ကိုယ့်ရှေ့ဖြန့်ကြည့်လို့မှ မမြင်ရ၊ လမ်းမီးတိုင်တွေက ပျက်တခု ပိတ်တလုံးနှင့် မှောင်ပိန်းနေသည်။ သိမ်းစ ပြုနေပြီဖြစ်သော လဘက်ရည်ဆိုင်နှင့် ကွမ်းယာဆိုင်တွေက အလင်းရောင်သာ မထိတထိ အလင်းရှိနေသည်။ ကိစ္စ မရှိ၊ ကိုယ့်နေရာပဲ၊ ဒိအတိုင်း ပြန်ခဲ့ကြတာ ကြာလှပြီလေ။ ကြောက်စရာမှ မရှိတာ။ သီချင်းအော်ဆို၊ ညီမလေးကို ဇီးထုပ်တစ်ကျပ်တန်လေး ပြေးဝယ်ကျွေးရင်း လာခဲ့ပြီး ကိုယ်တို့အိမ်ခန်းကလေး(တန်းလျား)တွေက လမ်းချားလေးထဲမှာမို့ လမ်းချားထိပ်ရောက်ရင် အမေရေ လို့ အော်ခေါ်ရသည်။ သရဲကြောက်သည်လေ၊ လမ်းချားအဝင်ဝမှာ ရေတွင်းနှင့် ဟိန္ဒူဘုရားကျောင်းရှိသည်။ သူများပြောတော့ သရဲလား၊ နတ်လား ရှိသည်တဲ့။ တွေ့မှာကြောက်ပါသည်။ အမေက ကိုယ်ဝန်တကားကားနဲ့ ဖယောင်းတိုင်လေး လက်မှာကိုင်ကာ ထွက်ကြိုပါမှ ကိုယ်တို့လမ်းချားထဲ ဝင်ရဲသည်။ ညီမလေးကတော့ ပြောသား။ မကြီးကလည်း အမေ ကလေးမွေးရင် ဘယ်သူလာထွက်ကြိုမှာလဲတဲ့။ ဟုတ်တော့ ဟုတ်သားပဲ၊ ငါတို့လည်း မတွေ့ဖူးဘဲနဲ့နော်။

ပြန်ရောက်တော့ ခြေလက်ဆေးပြီး (ပူအိုက်ရင်တော့ ရေချိုးပါသည်) ထမင်းစား၊ ပြီး မုန့်ရုံက ယူခဲ့သော ပလတ်စတစ်ကြိုးကို မောင်နှမတွေရော အမေပါ ဝိုင်းချည်ကြ၊ ပြီးရင် တန်းစီပြီး အိပ်မည်။

အဲဒီ နေ့တဓူဝ အလုပ်ထဲမှာ ဘယ်လောက် ကြာကြာနေရ လက်ပစ်ကူးရဦးမလဲ… မတွေးတတ်ပေမယ့် မနက်ဖြန်က ကိုယ့်အတွက် ရှိနေသလိုပဲ။ မနက်လုပ်စရာရှိတာကိုက ကိုယ့်ဘဝ….။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

ဝတီဧရာ

2010-12-19T13:30:00.000+07:00

မေခနဲ့ မလိခ ရောလို့

ချင်းတွင်းနဲ့ ပေါင်းဆုံ

ဒီနေရာမှာ ဧရာတဲ့…။

တငြိမ့်ငြိမ့်စီးရင်း

လှုပ်လီလှုပ်လဲ့ အပျိုမလို

မာန်မများ ဟန်ထွားထွားနဲ့လေ…။

အပြောကျယ်စွာ ဝပ်ဆင်း

သူ မသိတဲ့ဟန်နဲ့

ဥာဏ်များတာလည်း သူပဲမို့…

မာယာများတယ်ရယ်လို့

တခုတ်တရ စွပ်စွဲ

သူကတော့ မာန်ဖြည့်လျက် ဝဲဆဲပါပဲ..။

သူ့ရင်ခွင်ထဲ

အပျော် အလှ ခရီးသည် ကုန်

စုံနေအောင် တင်ရင်း

တရွေ့ရွေ့လေး ဝေ့ဝိုက်

သူ အိပ်တောင်မငိုက်ရဲခဲ့ပါဘူး…။

ဝဲကတော့တွေ တရှဲရှဲအော်လို့

လှိုင်းတွေလည်း ငိုချင်းချ

သူကတော့ မာန်မချ

သူ့ဘဝကို သူ့ပင်လယ်ထဲ ရောက်အောင် ပြေးနေလေရဲ့။

ရိုးမ တောင်တန်းတွေကို ချစ်တယ်။

နှင်းဖွေးဖွေးတွေထဲ ဖြတ်ရင်း ဖြတ်ရင်း ပြေးမယ်။

အညာမြေကလေးမှာ တထောက်နားရတာလည်း ဟန်ကျ။

ရန်ကုန်လို မာန်မဟုန်သေးတဲ့

ဒီမြို့လေးကို လက်တံတွေနဲ့ ဖြာဆင်း

သူ နှုတ်ဆက်တော့ ဟိုးးးး အဝေးက ကပ္ပလီပင်လယ်။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

နာကျင်စွာဖြင့် သို့မဟုတ် နာကျည်းစွာဖြင့်

2010-11-30T16:17:00.001+07:00

ဇူလိုင်မဟုတ်ပါဘဲ

အလွမ်းမိုးတွေ သည်းဖို့

ချစ်ခြင်းတွေ စတည်ခဲ့တာ

ဒီလို နိုဝင်ဘာမှာလေ။

နွေးထွေးစွာ ချိုမြ

သူ့အပြုံးတွေ အောက်မှာ

ပီကေတစ်ခုလို အချို ရှိသလောက်

ဝါးချေစေချင်ခဲ့တာပ။

ရသာကုန် ထွေးမဟုန်သေးပါဘဲ

တဖောက်ဖောက်မြည်

သူ ပူဖောင်း မှုတ်ပြန်သည်(လည်း)

ဆန္ဒ ဆိုတာ

ကိုယ် မသိတဲ့ ဝေါဟာရလို

ငြိမ်ဆိတ် ကြေမွ ပေးခဲ့သည်ပဲ။

ရှိပါစေလေ။

ထားခဲ့ချင်မှတော့

ဖြစ်တဲ့နည်းနဲ့ နေရစ်မှာပါ။

တစ်ယောက်တည်း ဆိုတဲ့ ခရီး

ခါးသီးလွန်းရင်တောင်……

တွဲထားဖူးတဲ့ လက်တွေအတွက်

တသသ တမ်းတမိရင်တောင်……

အသတ်ခံခဲ့ရတဲ့ မျှော်လင့်ချက်တွေနဲ့

နာလန်ထူဖို့ ခက်ခဲခဲ့ရင်တောင်……

မနက်ဖြန်ဆိုတာတွေကို

နှလုံးသား မပါလည်း

မာန တခုတည်းနှင့် ဆက်လက်ရင်ခုန်မယ်။

ရူးမတတ် မက်မောမိပေမဲ့

အဲဒီ ရင်ဘတ်က ရှောင်ဖယ်ရက်တဲ့အခါ

တွယ်ကပ်ပြီး ရှေ့ ဆက်ဖို့အထိတော့

ဘဝကို ခဝါ မချရက်ဘူးလေ…။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

ရွှေပြည်တော် ခေါ်တဲ့ တေး

2010-11-27T09:44:00.000+07:00

အသိုက်ပျောက်တဲ့ ငှက်က
အသိုက် ဆောက်မယ့် အိပ်မက်ကို မက်ရင်း
သက်ပြင်းတွေ လူးလား ခေါက်တုံ့
သရုပ်ဆောင် မကောင်းတဲ့ ဇာတ်ရုပ်လို
ဒီအိမ်ဝေးတဲ့ အခန်းမှာ
မေမေ့ကို လွမ်းတယ်.....
လောကဓံ အနမ်းတွေ အောက်မှာ
ကိုယ့်ဘဝ ကိုယ်စောင့်ရှောက်လို့
ဒုက္ခ ရသတွေ အကြောင်း
မေမေ့ကို
ဟာသမြောက်အောင် ပြောပြရဦးမယ်.....
အနန္တငါးပါး အမှီနဲ့
မညီတဲ့ လမ်းတွေ လျှောက်နေချိန်မှာ
မေမေရေ...
ရွှေပြည်တော်က အိပ်ရာဝင်တေးတွေနဲ့
မျှော်တိုင်း ဝေးမှာ တွေး ကြောက်ပါရဲ့.........။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

ကာရံမညီ

2010-09-28T09:19:00.003+07:00

-ဗီးနပ်စ် တဲ့
မီးဖိနပ်ကို စီးရတဲ့ ကချေသည်
သူ့အတွက် တီးလုံးကိုတော့
မိုးလေး နည်းနည်း အုံ့ပေးကြပါ။
-ကိုယ့်မြင်း ကိုယ်စိုင်းခဲ့တာပဲ။
ဘယ်အုတ်တံတိုင်းကို တွေ့တွေ့
ကွေ့ ဖြတ်ကျော်မယ်။
-ရနံ့ မရှိရင် ပန်း မဟုတ်ဘူးလို့တော့
တဖက်သတ် မပြောလိုက်ပါနဲ့။
လမ်းလျှောက်ထွက်လာသူတွေ
ငါ့ ရင်ထဲက စာတန်း တွေ့ မသွားကြဘူး။
…….လွမ်းမိတယ်……။
-တကယ်တော့
ကမ္ဘာ လောကကြီးဆိုတာကိုက
အကြိမ်ကြိမ် အကယ်ဒမီရနေတဲ့
ဂန္တဝင်မြောက် ရုပ်ရှင်ကားလေ။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

စိတ်စေရာ

2010-09-24T14:46:00.001+07:00

-စိတ် အဆာမပြေတဲ့အခါ
လိပ်ပြာတွေလည်း မသန့်
အိပ်ရာတွေလည်း တွန့်ကြေမွတယ်။
-လူးလွန့်ခြင်းရဲ့ ရသဟာ
သမုဒယတွေကို ပွေ့ဖက်
မေ့ကွက်တွေကို ဝေးစေတာပေါ့။
-မမေ့လောက်တဲ့ သူတွေအဖို့
ဝေးခဲ့လည်း နီးသထက် နီး
ဟောသလို….
ကတ်သီးကတ်သတ် လဝန်းကလေးနဲ့
နွေးထွေးရတဲ့ ညအဆင်းမှာ
မပျင်းနိုင်ပါဘူးကွယ်။
-ဒီလိုနဲ့
မငြင်းနိုင်တဲ့ ပုစ္ဆာတွေကို
တစ်ပုဒ်ပြီး တစ်ပုဒ် ထုတ်
ရုပ်ကမ္ဘာထဲ ချကြည့်
(အင်းးး)
ခုထိတော့ ချောချောမောမော ရှိတုန်းပါပဲ။။။။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်

အကျွံ

2010-09-12T10:38:00.003+07:00

သောက အစွန်းအပေတွေနဲ့

မသေသပ်ခဲ့သမျှ

မနေတတ်ခဲ့တဲ့ ငါ

ဇာတ်လမ်း ကြိုသိစေတဲ့အဖြစ်

ကြေညက်ခဲ့တာတော့ ကြာပြီ။။။။။။

ပြန်.....ပြန် ကျော့မိတဲ့

ပေါ့ပေါ့ဆဆ ညစိမ်းတွေ

သူ့လက်နဲ့ လာလိမ်းခြယ်နေသေးရဲ့..

မျက်လွှာချပုံလေးက

တကယ့် ယုန်အ တစ်ကောင်။

မာယာနဲ့ ပစ်အဖမ်းမှာ

ယောင်ယမ်းဇွတ်တိုး

မုဆိုးရဲ့ရှိုက်သံ သဲ့သဲ့

တောပြိုအောင် ဖွဲ့။။။။။

စာဖတ်သူ မောင်နှမ သူငယ်ချင်းများအား ကျေးဇူးတင်စွာဖြင့်